სამწუხარო ნოტაზე დაასრულა ბელგიის ჩემპიონატი თორნიკე შენგელიამ. ყველაფერი ერთმა ქულამ გადაწყვიტა. ჩემპიონატის ფინალური სერიის მე-5, გადამწყვეტ მატჩში ქართველი კალათბურთელის „შარლერუა“ 74:75 დამარცხდა „ოსტენდესთან“ და ვერცხლის მედლებს დასჯერდა.

შარლერუელები ახლოს იყვნენ გამარჯვებასთან, მაგრამ მასპინძლებმა მაინც მოახერხეს გამარჯვება და ჩემპიონობაც მათ დარჩათ. ქართველი კალათბურთელი თავის გუნდში ერთ-ერთი საუკეთესო იყო. შენგელიამ სასტარტო ხუთეულში ითამაშა და მოედანზე გატარებულ 25 წუთში 14 ქულა მოაგროვა. ეს მეორე შედეგია შარლერუელთა შორის, ისევე როგორც მის მიერ მოგროვებული მარგი ქმედების კოეფიციენტი - 13.

შენგელიამ 9-დან 6 ორქულიანი და 4-დან 2 საჯარიმო ჩააგდო, სამქულიანი ააცილა, ბურთი სამჯერ დაკარგა, 2 პერსონალური მიიღო და მის წინააღმდეგ სამჯერ დაჯარიმდნენ. 14 ქულასთან ერთად შენგელიამ 3 მოხსნა, 3 დაფარება და 2 ჩაჭრა მიითვალა.

თორნიკე ბელგიიდან იტალიაში გადავა, სადაც ნბა-ს მიერ ორგანიზებულ „ადიდასის“ კემპში მიიღებს მონაწილეობას. ქალაქ ტრევიზოს ცნობილ კემპზე თავს ნბა-ს უამრავი სკაუტი მოიყრის თავს.