თბილისის კალათბურთის განვითრების კავშირის გადაწყვეტილებით 18-წლამდელთა “ბ” ლიგის ჩემპიონი თსუ გახდა

18-წლამდელთა “ბ” ლიგის გათამაშება დასრულდა. ჩემპიონი გახდა თბილისის სახელმწიფო უნივერსიტეტის გუნდი, ხოლო მეორე ადგილი “დინამოს” ერგო. ეს გადაწყვეტილება მიიღო თბილისის კალათბურთის განვითარების კავშირის გამგეობამ, რომლის გადაწყვეტილებითაც ფინალური სერიის დღეს დაგეგმილი მეორე მატჩი გაუქმდა და გამარჯვებული გუშინ გამართული სერიის პირველი შეხვედრის შედეგის გათვალისწინებით გამოვლინდა.

ფინალური სერიის გუშინდელი მატჩის დასრულებამდე 6 წუთით ადრე თსუ “დინამოს” 93:73 უგებდა, როცა მოედანზე მოთამაშეთა შორის ხელჩართული ჩხუბი გაიმართა. მოთამაშეთა შორის კონფლიქტი სათამაშო ეპიზოდს მოჰყვა, რის შემდეგაც მოედანზე ორივე გუნდის წევრები შეცვივდნენ და ხელჩართული ჩხუბი გააჩაღეს. მსაჯებმა ორივე გუნდიდან 8-8 მოთამაშეს მისცეს დისკვალიფიკაცია, ხოლო მატჩი 4-4 მოთამაშემ ჩაამთავრეს. შეხვედრა თსუ-ის გამარჯვებით – 102:85 დასრულდა ხოლო დღეს ინციდენტის შესახებ გადაწყვეტილების გამოსატანად თბილისის კალათბურთის განვითარების კავშირი შეიკრიბა, რომელმაც ფინალური სერიის მეორე მატჩის გაუქმების გადაწყვეტილება მიიღო, რადგან ორივე მხრიდან იმდენი დისკვალიფიცირებული იყო, რომ მატჩის ჩასატარებლად საკმარისი მოთამაშეები არ იქნებოდნენ. 

მხედველობაში მიღებულ იქნა ფინალური სერიის პირველი მატჩის შედეგი და ჩემპიონად თსუ გამოცხადდა, ხოლო დინამოელებს ვერცხლის მედლები გადაეცათ. გამგეობის გადაწყვეტილებით, დასახელდნენ ტურნირის ინდივიდუალური პრიზების მფლობელები. საუკეთესო მოთამაშე გახდა მესამე ადგილზე გასული “მართვეს” ლიდერი ლევან შეროზია, ხოლო მაყურებელთა სიმპატიის პრიზი “ორბის” წევრ სანდრო ზანდუკელს ერგო. 

რაც შეეხება იმ მოთამაშეთა დისციპლინარულ სანქციებს, რომლებიც ფინალური მატჩიდან იქნენ დისკვალიფიცირებულნი, ამაზე კავშირის სადისციპლინო კომისია მოგვიანებით იმსჯელებს და შესაბამის დასკვნებს გამოიტანს.