საკალათბურთო სუპერლიგის ნახევარფინალური სერიის მეორე შეხვედრა „ბათუმის“ გამარჯვებით დასრულდა. ზღვისპირელებმა, რომლებმაც ინფრასტრუქტურული პრობლემების გამო ამჯერადაც „თბილისი არენაზე“ უმასპინძლეს მეტოქეს, პირველი მატჩისგან განსხვავებით, სტარტზევე მოიპოვეს სოლიდური უპირატესობა და ქუთაისი 90:82 (სტატისტიკა) დაამარცხეს. ამ გამარჯვებით სერიაში ანგარიში გათანაბრდა — 1:1.
მატჩი ბათუმელთა სრული დომინაციით დაიწყო. ბუბა ბერიშვილის გუნდმა პირველივე მეოთხედში მოახერხა 9-ქულიანი ფორის მოპოვება (20:11), რაც შეხვედრის საბოლოო ბედისთვის გადამწყვეტი აღმოჩნდა. პირველი მატჩისგან განსხვავებით, სადაც ქუთაისი ფლობდა ინიციატივას, ამჯერად ბათუმელებმა დაცვაში გაცილებით მაღალი კონცენტრაცია აჩვენეს და მეტოქეს იოლი ქულების მოპოვების საშუალება არ მისცეს. მიუხედავად იმისა, რომ კოტე ტუღუშის შეგირდებმა მეორე და მესამე პერიოდებში თამაში გაათანაბრეს, ბათუმის ლიდერობა მყარი დარჩა და ერთ ეპიზოდში სხვაობამ 16 ქულასაც კი მიაღწია.
გამარჯვებულთა რიგებში ბრწყინვალე მატჩი ჰქონდა გიორგი ოჩხიკიძეს, რომელმაც 23 ქულა, 7 მოხსნა და 5 შედეგიანი გადაცემა დააგროვა. ორმაგი დუბლით გამოირჩა აკაკი დვალიშვილი — 17 ქულა და 7 მოხსნა. სტაბილურად ითამაშა მაირინ ტომასმა, რომელმაც გუნდს 17 ქულა და 9 მოხსნა შესძინა, ხოლო დავით ლომიძემ შეხვედრა 16 ქულით დაასრულა.
ქუთაისელთა მხრიდან საუკეთესო იყო ტაირი ბოიკინი 23 ქულით. დეტრეკ ბრაუნინგმა 19 ქულა და 8 პასი მიითვალა, ხოლო გიორგი სულაბერიძემ 18 ქულა და 8 მოხსნა ჩაიწერა აქტივში. კახა ჯინჭარაძემ ამჯერად 9 ქულა მოაგროვა.
ნახევარფინალური სერია ახლა ქუთაისში გადაინაცვლებს, სადაც კიდევ ორი შეხვედრა გაიმართება. აღსანიშნავია, რომ თუ საქმე მეხუთე, გადამწყვეტ მატჩამდე მივა, მას ბათუმი უკვე საკუთარ კედლებში უმასპინძლებს, რადგან იმ დროისთვის ქალაქის დარბაზი თავისუფალი იქნება.
