ბურჯანაძის შედეგიანი მატჩების სერია გრძელდება: 23 ქულა პალენსიაში

ბურჯანაძე წარმატებულ თამაშს ახალი წლიდანაც აგრძელებს. ესპანეთის მეორე დივიზიონის „ლეიმა ბასკეტში“ მოთამაშე ქართველმა ფორვარდმა მორიგ ტურში თავის გუნდს 23 ქულა მიაშველა, თუმცა სტუმრად „პალენსიის“ დასამარცხებლად ეს საკმარისი არ აღმოჩნდა. ბურჯანაძის შედეგიანობით ლაკორუნიელებმა ბოლო 6 შეხვედრა მოიგეს, თუმცა წარმატებული სერია პალენსიაში დაძაბულ ბრძოლაში შეწყვიტეს – 86:91 წააგეს.
ბურჯანაძე ორივე გუნდის შემადგენლობაში საუკეთესო იყო. ქართველმა ფორვარდმა 28 წუთი ითამაშა და 23 ქულა, 8 მოხსნა და 2 ჩაჭრა მიითვალა. ბექამ 13-დან 7 ორქულიანი, 3-დან 1 სამიანი და 6-ივე საჯარიმო ჩააგდო. ბურჯანაძის მარგი ქმედების კოეფიციენტმა 27 შეადგინა, რაც ორივე გუნდში საუკეთესო შედეგი იყო.
7 მოგებითა და 9 მარცხით „ლეიმა ბასკეტი“ მე-10 ადგილზეა. მომდევნო ტურში, 8 იანვარს ლაკორუნიელები „მელილას“ უმასპინძლებენ.