გიორგი შერმადინის 7 ქულა, 6 მოხსნა და დასანანი მარცხი მანრესასთან

გიორგი შერმადინის გუნდმა ესპანეთის უმაღლეს ლიგაში დასანანი მარცხი იწვნია. მორაბანკ ანდორამ მანრესას უმასპინძლა და დაძაბულ ბრძოლაში – 74:77 წააგო. ბოლო მეოთხედის დაწყებამდე ანდორელები 3 ქულით იგებდნენ, მაგრამ გადამწყვეტი პერიოდი 16:21 დათმეს და საბოლოოდ მარცხი განიცადეს.
შერმადინი სათადარიგო იყო და მოედანზე 15:17 წუთით გამოჩნდა. ქართველმა ცენტრმა 2-დან 1 ორქულიანი და 6-დან 5 საჯარიმო ჩააგდო. გიორგიმ 7 ქულა და 6 მოხსნა მოაგროვა, მთლიანობაში კი მარგი ქმედების კოეფიციენტით (12) ანდორელთაგან მე-3 იყო. მასზე მეტი შონ ჯონსმ (28) და ვოიდან სტოიანოვსკიმ (18) მოაგროვა.
3 ტურის შემდეგ შერმადინის გუნდს 1 მოგება აქვს და ცხრილში მე-12 ადგილზე იმყოფება. მომდევნო მატჩს ანდორელები 1 ნოემბერს, სტუმრად ფუენლაბრადასთან გამართავენ.