ამერიკაში დაიწყო სტუდენტური ლიგის მატჩები. სანამ კონფერენციები შიდაჩემპიონატებს გააჩაღებენ, იმართება არასაკონფერენციო მატჩები, რომელთა კალენდარსაც გუნდები ერთმანეთთან და ლიგასთან შეთანხმებით ადგენენ. ანუ ეს გახლავთ დაახლოებით იმგვარი რამ, რაც ნბა-ში საგამოფენო მატჩებია. ამ სეზონში ამერიკის სტუდენტური ლიგის წამყვან კალათბურთელებში სახელდება და ამ სტატუსს წარმატებით ამართლებს სანდრო მამუკელაშვილი, რომელმაც ნბა-ს გასული დრაფტიდან კანდიდატურა მოხსნა და კიდევ ერთ სეზონს სტუდენტული ლიგის ერთ-ერთ წამყვან კონფერენცია Big East-ში მოასპარეზე გუნდ “სეტონ ჰოლ პირატსში”გაატარებს.
მამუკელაშვილმა მესამე არასაკონფერენციო მატჩი გამართა “მეკობრეთა” რიგებში და კვლავ სოლიდური შედეგიანობით გამოირჩა.
21 წლის ქართველი ფორვარდის კლუბმა სტუმრად როდ აილენდ რემსთან 63:76 წააგო, მამუკელაშვილი კი ორივე გუნდის რიგებში ყველაზე შედეგიანი იყო. სანდრომ ასევე ყველაზე მეტი – 38 წუთი ითამაშა და სტუმრებს 25 ქულა, 10 მოხსნა (3 შეტევაში), 2 პასი და 1 ჩაჭრა შესძინა.
ქართველმა ლეგიონერმა 9-დან 4 ორქულიანი, 8-დან 4 სამქულიანი და 9-დან 5 საჯარიმო ჩააგდო, ბურთი 3-ჯერ დაკარგა და 2 პერსონალური ფოლი მიიღო.
სეტონ ჰოლს მიმდინარე სეზონში 1 მოგება და 2 მარცხი მოუგროვდა, ქართველი კალათბურთელის საშუალო მონაგარი კი 21.6 ქულა და 9 მოხსნაა. შეგახსენებთ, რომ 28 ნოემბერს მამუკელაშვილმა სეზონის პირველ შეხვედრაში “ლუისვილთან” 70:71 წაგებულ შეხვედრაში 22 ქულა და 10 მოხსნა მიითვალა, შემდეგ “იონასთან” იოლად – 86:64 მოგებულ მატჩში პირად ანგარიშზე 18 ქულა ჩაიწერა.
“სეტონ ჰოლი” მომდევნო შეხვედრას 5 დეკემბერს ორეგონ დაქსთან ჩაატარებს.
