NBA-ს რეგულარული ჩემპიონატის სტარტზე ზედიზედ სამი გამარჯვების შემდეგ, „ლოს ანჯელეს ლეიკერსი“ პირველად დამარცხდა. ჯეი ჯეი რედიკის გუნდმა საკუთარ არენაზე „პორტლენდ ტრეილ ბლეიზერსს“ უმასპინძლა და უხვქულიან, დრამატულ ორთაბრძოლაში 129:136 დათმო შეხვედრა.
ლოსანჯელესელები თამაშის უდიდეს ნაწილს კარგად აკონტროლებდნენ და უპირატესობასაც ფლობდნენ, თუმცა გადამწყვეტი გამოდგა დასკვნითი მეოთხედი, რომელიც მასპინძლებმა 26:34 ჩააგდეს.
მარცხის მიუხედავად, ბრწყინვალე მატჩი ჩაატარა სანდრო მამუკელაშვილმა. 27 წლის ქართველი ფორვარდი თამაშში სათადარიგო სკამიდან ჩაერთო და გამოყოფილ 24 წუთში „ლეიკერსს“ 17 ქულა, 4 მოხსნა (1 შეტევაში), 2 შედეგიანი გადაცემა და 1 დაფარება მოუტანა. სანდრო განსაკუთრებით შთამბეჭდავი პერიმეტრიდან გახლდათ — მან 4-დან 3 სამქულიანი მოათავსა კალათში, რასაც 5-დან 3 ორქულიანი და 2-დან 2 ზუსტი საჯარიმო დაუმატა.
მამუკელაშვილი განსაკუთრებით პირველ ტაიმში აქტიურობდა, სადაც 12 წუთში 13 ქულა მოაგროვა. პირველი ნახევრის კულმინაცია კი მისი ზუსტი სამქულიანი გახლდათ, რომელიც სანდრომ სირენის ხმასთან ერთად ჩააგდო და „ლეიკერსი“ დიდ შესვენებაზე 5-ქულიანი უპირატესობით (73:68) გაიყვანა. ქართველს პასივში მხოლოდ 1 დაკარგვა ჰქონდა, ხოლო მისი პლუს-მინუს მაჩვენებელი (+6) გუნდში ერთ-ერთი საუკეთესო იყო — მასზე მაღალი ინდიკატორი (+7) მხოლოდ ლუკა დონჩიჩს დაუფიქსირდა.
სლოვენიელმა ვარსკვლავმა შეხვედრა 41 ქულით, 5 მოხსნითა და 9 პასით დაასრულა. „ლეიკერსის“ შემადგენლობაში 26 ქულა, 4 მოხსნა და 7 პასი მიითვალა ოსტინ რივზმაც.
სტუმართა რიგებში, რომლებმაც სეზონი ზედიზედ ოთხი მოგებით დაიწყეს, 23-23 ქულით ჯა მორანტი და დენი ავდია (9 პასი) გამოირჩნენ. 22 ქულა მიითვალა ჯრუ ჰოლიდეიმ, 21 — დემიენ ლილარდმა, ხოლო რობერტ უილიამსმა შეხვედრის ერთადერთი ორმაგი დუბლი შეასრულა (14 ქულა, 10 მოხსნა).
4 მატჩის შემდეგ „ლოს ანჯელეს ლეიკერსს“ 3 მოგება და 1 მარცხი აქვს და დასავლეთ კონფერენციაში მე-6 ადგილზე იმყოფება. მორიგ შეხვედრას ჯეი ჯეი რედიკის გუნდი 29 ოქტომბერს, სტუმრად „ლოს ანჯელეს კლიპერსის“ წინააღმდეგ ჩაატარებს.
