მარკოიშვილმა “ზენიტთან” მოგებულ მატჩში სასტარტო ხუთეულში ითამაშა

მანუჩარ მარკოიშვილი მოსკოვის ცსკა-ს სასტარტო ხუთეულში დაბრუნდა. ქართველ უკანახაზელს ფეხის ტრავმა აწუხებდა და რამდენიმე მატჩი გამოტოვა. წინა შეხვედრაში ის მოედანს დაუბრუნდა, თუმცა მხოლოდ 9 წუთი ითამაშა, გასულ მატჩში კი ის ძირითად ხუთეულში იყო და მოედანზე 22 წუთზე მეტ ხანს დაჰყო.
არმიელებმა ვითიბი ლიგაში სანკტ-პეტერბურგის „ზენიტი“ მიიღეს და იოლად – 102:86 დაამარცხა. 22:07 წუთში მარკოიშვილმა 4-დან 3 ორქულიანი ჩააგდო, 1 სამიანი კი ააცილა. მანუჩარმა საბოლოოდ 6 ქულა, 2 პასი და 1 მოხსნა მიითვალა, ბურთი კი ერთხელ დაკარგა.არმიელთაგან საუკეთესო მაჩვენებელი პაველ კორობკოვს ჰქონდა, რომელმაც საშა კაუნთან ერთად 18-18 ქულა დააგროვა. 22 მოგებითა და 3 წაგებით ცსკა ვითიბი ლიგას ლიდერობს.