ქართველების “სარაგოსას” ევრომეტოქეები: “ბეშიქთაში”, “ცედევიტა”, “ლიეტუვოს რიტასი”

ევროთასის მეორე ჯგუფურ ეტაპზე ესპანური “სარაგოსას” მეტოქეები ცნობილნი არიან. გიორგი შერმადინისა და ვიქტორ სანიკიძის გუნდი P ჯგუფში მოხვდა, სადაც მეტოქეებად ხორვატიული “ცედევიტა”, თურქული “ბეშიქთაში” და ლიტვური “ლიეტუვოს რიტასი” ეყოლება.
შეგახსენებთ, რომ პირველ ჯგუფურ ეტაპზე სარაგოსელებმა 10-დან 6 შეხვედრა მოიგეს და ფრანგულ “გრაველინსა” და გერმანულ “ალბასთან” ერთად მეორე ეტაპზე გავიდნენ. გათამაშების ფორმატის თანახმად, ჯგუფიდან გასულ 24 გუნდს ევროლიგის ჯგუფებში ჩარჩნილი 8 გუნდი დაემატა და 32 კლუბი შეიკრა, რომლებიც 8 ჯგუფში, 4-4-ად გადანაწილდნენ.
მეორე ჯგუფური ეტაპი 2 წრედ ჩატარდება. გამართული 6 ტურის გათვალისწინებით მომდევნო ეტაპზე ჯგუფებში I და II  ადგილებზე გასული გუნდები გავლენ. ევროთასის მოსაპოვებლად ბრძოლას 16 გუნდი მერვედფინალიდან განაგრძობს.