თორნიკე შენგელიამ ევროლიგაში მორიგი გამორჩული მატჩი ჩაატარა და თავის „ბასკონიას“ მორიგი, პრინციპული დაპირისპირების მოგებაში დიდად დაეხმარა. ვიტორიელები ერთ-ერთ ფავორიტ „ჟალგირისს“ კაუნასში ეწვივნენ და ისე მოუგეს, შანსი არ დაუტოვეს – 97:77. აღსანიშნავია, რომ ბასკონიელებმა წინა ტურში მადრიდის რეალი“ გაანადგურეს, არადა, ევროლიგის მიმდინარე სეზონი 4 მარცხით დაუწყეს და ამის ფონზე მართლაც დიდ პროგრესს განიცდიან.
სასიხარულოა, რომ ამ წინსვლის ერთ-ერთი წინამძღოლი ქართველი კალათბურთელია. შენგელია თამაშში სათადარიგოთა სკამიდან ჩაერთო და მოედანზე მყოფთაგან ერთ-ერთი საუკეთესო გახლდათ. ბასკონიელთა ქართველმა კაპიტანმა 27:23 წუთში 19 ქულა, 8 მოხსნა, 2 პასი და 1 ჩაჭრა მიითვალა.
თორნიკემ 7-დან 5 ორქულიანი, 2-დან 1 სამქულიანი და 8-დან 6 საჯარიმო ჩააგდო, ბურთი 4-ჯერ დაკარგა, 3 პერსონალური ფოლი მიიღო, მის წინააღმდეგ კი ერთბაშად 8-ჯერ დაჯარიმდნენ.
შედეგად, ქართველი ფორვარდის სარგებლიანობის კოეფიციენტი 26-ს გაუტოლდა, რაც გერმანელი იოჰანეს ვოიგტმანის (15 ქულა, 8 მოხსნა, 4 პასი, 2 დაფარება) მსგავსად, საუკეთესო მაჩვენებელი იყო.
3 მოგებითა და 5 მარცხით 16-გუნდიან ევროლიგაში „ბასკონია“ მე-11 ადგილზეა. მომდევნო მატჩს კი, 23 ნოემბერს, ბელგრადში, “ცრვენა ზვეზდასთან” გამართავს.
