შენგელიას ბასკონიამ უნიკახა ოვერტაიმში დაამარცხა და ნახევარფინალს მიუახლოვდა

ესპანეთის ჩემპიონატის ფინალური ფაზა დასასრულს მიუახლოვდა. ბოლოსწინა ტურში დრამატული მატჩი მოიგო თორნიკე შენგელიას “ბასკონიამ”, რომელმაც უშუალო მეტოქე – “უნიკახა” ოვერტაიმში დაამარცხა და ნახევარფინალს მიუახლოვდა.

საოცარი სანახავი იყო დამატებითი დროის ბოლო წამები: დასკვნით 60 წამში გუნდებმა სამქულიანები გაცვალეს. “ბასკონიას” გამთანაბრებელი სამიანის შემდეგ ტაბლოზე 86:86 დაფიქსირდა. შეტევა მალაგელებს დარჩათ, რომლებმაც ჯერ სამქულიანი ვერ ჩააგდეს, ფარიდან ასხლეტის შემდეგ კვლავ ბურთს დაეუფლნენ, მაგრამ მეორედაც არაზუსტად…

ბოლო 6 წამში ბურთი შენგელიამ მიიღო, მეტოქის ნახევარზე გადაიტანა და ოქროს პასი გადასცა პოლონარას. მართალია, მან ბურთის ჩაგდება ვერ მოახერხა, მაგრამ მოწინააღმდეგეებს ჯარიმა დასტყუა და სირენამდე 1 წამით ადრე საჯარიმოს ხაზზე დადგა. ორიდან ერთი ჩააგდო და – 87:86 “ბასკონიას” სასარგებლოდ.

თორნიკე შენგელიამ 27 წუთში 9 ქულა, 7 პასი და 4 მოხსნა მოაგროვა. “ბასკონიას” ბომბარდირი 14 ქულით “ვითას” ყოფილი კალათბურთელი პიერია ჰენრი გახდა.

შეგახსენებთ, რომ 12 გუნდი 2 ჯგუფშია განაწილებული და თითო წრეს – ანუ 5 ტურს თამაშობს. ჯგუფებში 2-2 საუკეთესო გუნდი ნახევარფინალში გავა. დღეს, გვიან ღამით დასრულდება გიორგი შერმადინის “ტენერიფესა” და “ხუვენტუდის” შეხვედრა, რომელსაც თუკი ტენერიფელები მოიგებენ, “ბასკონია” ნახევარფინალში ჯგუფური ეტაპის დასრულებამდე 1 ტურით ადრე გავა.