შვედეთის ნაკრები თბილისში გუშინ საღამოს ჩამოვიდა და გუშინვე ღამე ივარჯიშა სპორტის სასახლეში. შვედების ჩამოსვლას წინ ახლდა მათი ნაკრების ასისტენტი მწვრთნელის, პუნტუს ფრივოლდის სტუმრობა, რომელმაც სკანდინავიელ კალათბურთელებს თბილისში ნიადაგი მოუმზადა. კერძოდ, პუნტუსმა თავის გუნდს თბილისში სატრენაჟორო გამოუძებნა და სანამ შვედები წუხელ სპორტის სასახლეს მიაშურებდნენ სავარჯიშოდ, „პრაიმ ფიტნესში“ შეიარეს.
შესაბამისად, ვარჯიშის დაწყება შვედებს გვიან მოუხდათ. კოსტას ფლევარაკისის გუნდმა სპორტის სასახლეში 10–დან 11 საათამდე ივარჯიშა და სასტუმროში დაბრუნდა.
დღეს დილას შვედებმა ვარჯიშს ქალაქში გასეირნება ამჯობინეს. მათ ბოტანიკური ბაღი დალაშქრეს და ნარიყალაზეც უნდოდათ ასვლა, მაგრამ დროში ვეღარ ჩაეტივნენ – 12 საათისთვის მათ სასტუმროში თეორიული მეცადინეობა მოიწყვეს, რის შემდეგაც ცოტა დაისვენეს და 3 საათზე სპორტის სასახლეს სავარჯიშოდ მიაშურეს.
ჩვენი მეტოქე გვარიანად შესუსტებულია იმ შემადგენლობასთან შედარებით, რომლითაც მათ შარშან გვეთამაშეს. ნბა–ს დრაფტზე არჩევისა და „დეტროიტთან“ კონტრაქტის გაფორმების შემდეგ იონას იერებკო შვედების ნაკრებს გამოაკლდა, ხოლო ხუთეულის კიდევ ერთი წევრი იოაკიმ ბლომი პირადი მიზეზის გამო ვერ ეხმარება თავისიანებს.
შვედეთის შემადგენლობა:
4. ჯიმ ნისტრომი 194 1982 უგუნდო
5. ტომას მასამბა 185 1985 სოდერტალიე
6. მაიკლ ლინდკვისტი 193 1985 სტოკჰოლმი
7. მატს ლევინი 188 1977 სოლნა
8. მარტინ პალმბადი 193 1986 სოლნა
9. სერკან ინანი 198 1986 უგუნდო
10. კენი გრანტი 188 1986 ნორჩოპენგი
11. იოაკიმ კიელბუმი 213 1979 ნორჩოპენგი
12. იოჰან აკესონი 210 1984 პლანია
13. მარტინ რინგსტრომი 206 1981 უგუნდო
14. ლესლი მირთილი 200 1977 სოლნა
15. ჯონ სკიოლდებრანდი 203 1983 უგუნდო
მთავარი მწვრთნელი: კოსტას ფლევარაკისი
ასისტენტი: პუნტუს ფრივოლდი
შვედებმა ბოტანიკურ ბაღს საკუთარი რუქით მიაგნეს
