ცინცაძის 23 ქულამ “ჩემპვილს” “ბიბლოსთან” ვერ უშველა

გიორგი ცინცაძის მორიგი შთამბეჭდავი მატჩი ლიბანის ჩემპიონატში. ქართველი კალათბურთელის „ჩემპვილი“ სტუმრად „ბიბლოსს“ შეხვდა და ცინცაძის შედეგიანი თამაშის მიუხედავად უიმედოდ დამარცხდა – 69:86.
საქართველოს ნაკრების უკანახაზელმა 32 წუთი ითამაშა და თავისიანთაგან საუკეთესო იყო. ცინცაძემ 7-დან 5 ორქულიანი, 7-დან 4 სამიანი და 1-დან 1 საჯარიმო ჩააგდო. ჯამში მოგროვებულ 23 ქულასთან ერთად გიორგიმ 3 პასი, 2 მოხსნა და 2 ჩაჭრა მიითვალა, ბურთი კი ერთხელ დაკარგა. „ჩემპვილში“ 14-14 ქულა ჰქონდათ სერბ ვლადან ვუკოსავლიევიჩსა და ამერიკელ ფილიპ ტაბეტს.
5 მოგებითა და 10 მარცხით „ჩემპვილი“ 10-გუნდიან ჩემპიონატში მე-8 ადგილზეა. 4 აპრილს ცინცაძის გუნდი ცხრილში მე-4 ადგილზე მყოფ „მუთაჰედს“ უმასპინძლებს.