დუდუ დადიანის მემორიალის პირველი ნახევარფინალისტი ზესტაფონის მარგვეთია

დუდუ დადიანის მემორიალურ ტურნირზე დღეს ჯგუფური ეტაპის ბოლოსწინა ტურის მატჩები გაიმართა და 4 ჯგუფიდან 1 ნახევარფინალისტი გამოვლინდა. ეს გახლავთ ზესტაფონის “მარგვეთი”, რომელმაც ჯერ გუშინ სძლია ფავორიტად მიჩნეულ გურჯაანის “დელტას”, დღეს კი კიდევ ერთი რეგიონის გუნდი “რუსთავი” დაამარცხა და ნახევარფინალში გავიდა. ნიკოლოზ ჩერქეზიშვილის, მიხეილ კობეშავიძისა და ვატო თევზაძის გაწვრთნილმა მარგვეთელებმა ჯგუფის ორივე შეხვედრა მოიგეს და მეტოქეთათვის მიუწვდომლები გახდნენ. ბოლო ტურში ერთმანეთს დელტა და რუსთავი დაუპირისპირდებიან, თუმცა ამ მატჩის შედეგს სატურნირო თვალსაზრისით მნიშვნელობა დაკარგული აქვს.

A ჯგუფი
ზესტაფონის მარგვეთი vs რუსთავი
სტატისტიკა: 77:72

ზესტაფონის მარგვეთი ბევრისთვის მოულოდნელად შედეგიანად ასპარეზობს. ქართულ კალათბურთში საერთოდ ასეა: სეზონის სტარტზე განაცხადში რომელ გუნდსაც შედარებით გამოცდილი და მარჯვე ქართველი კალათბურთელები ჰყავს, ფავორიტადაც მას მიიჩნევენ, რადგან ლეგიონერები ყველას ჰყავს და თუ ნამდვილად სახელიანი უცხოელი არაა, ამ კომპონენტში ყველა თანაბრად მიიჩნევა. თუმცა მარგვეთი ის შემთხვევაა, როცა სწორედ ლეგიონერები ქმნიან ამინდს და ზესტაფონელებმა ნახევარფინალის საგზური რომ გაინაღდეს, ამერიკელების დიდი დამსახურებაა.

ქართველი კალათბურთელებით A ჯგუფის ფავორიტად გურჯაანის დელტა მიიჩნეოდა, რომელსაც მარგვეთმა პირველსავე მატჩში მწარე მარცხი აგემა და ეს რომ შემთხვევით არ გააკეთა, დღეს, რუსთავთან მატჩში დაამტკიცა. ქვემოქართლელებს არ ჰყავთ გამოცდილი ქართველები, თუმცა 4 უცხოელი ჩამოიყვანეს და საკმაოდ ანგარიშგასაწევ ძალას წარმოადგენენ, თუმცა ლეგიონერთა ჯახში გამარჯვებული მარგვეთი გამოვიდა – ტაიშონ კროუფორდმა ფარი დაიპყრო და კომფორტულ 16 ქულასთან ერთად 19 მოხსნა დააგროვა. მეორე ამერიკელმა, მაიკლ მეიესმა 23 ქულა მიითვალა და ზესტაფონელთა გამარჯვებაში ლომის წილი დაიდო. წინა მატჩის მსგავსად დიდებულად ითამაშა ლუკა ზაქრაძემ, რომელმაც ყველაფერი გააკეთა, რაც გამთამაშებელს მოეთხოვება – 7 პასი გაიღო, 4 ბურთი ჩაჭრა, 16 ქულა ჩააგდო და ბურთი 4-ჯერ ჩაჭრა.

მატჩის 4 პერიოდიდან რუსთაველებმა 3 მოიგეს, თუმცა გამარჯვება მაინც მარგვეთს დარჩა. ზესტაფონელებმა პირველი პერიოდი 36:25 მოიგეს, რის შემდეგაც ლიდერობა მცირე დათმობებით შეინარჩუნეს. ანატოლი ბოისას გაწვრთნილმა რუსთავმა მე-2, მე-3 და მე-4 პერიოდები შესაბამისად 1, 3 და 2-ქულიანი სხვაობებით მოიგო და წინ გაჭრილ მეტოქეს დროის ამოწურვამდე ვერ დაეწია. მარგვეთი კომფორტულ სიტუაციაშია:  ნახევარფინალი განაღდებული აქვს და ბოლო ტურში ისვენებს. ზესტაფონელები მეტოქეს C ჯგუფის გამარჯვებულის სახით ელიან, რომელიც ბათუმისა და კავკასიის დაპირისპირებაში გამოვლინდება.

C ჯგუფი
სპორტუნი vs ბათუმი
სტატისტიკა: 48:117

69-ქულიანი სხვაობა ყველაფრისმთქმელია. ეს არ გახლდათ სერიოზული დაპირისპირება. ბათუმმა ჯგუფის კიდევ ერთ ფავორიტთან, კავკასიასთან მატჩის წინ ივარჯიშა. სპორტის უნივერსიტეტის გუნდი სტუდენტური ლიგიდანაა და ცხადია, პროფესიონალ კალათბურთელებთან დაპირისპირებაში მოგებაზე არ ფიქრობდა. ახალგაზრდებს უფრო გამოცდილების მიღება სურდათ და ამ მხრივ ბათუმთან დაპირისპირებამ თავისი საქმე გააკეთა. ნუგზარ კანდელაკის გაწვრთნილმა გუნდმა სუპერლიგის ორ წარმომადგენელთან თამაშით ისეთი გამოცდილება შეიძინა, რომელსაც სტუდენტური ლიგის სხვა გუნდები ამ სეზონში ვერ მიიღებენ. 

ბათუმელებს რაც შეეხებათ, ბუბა ბერიშვილის გაწვრთნილ გუნდს ჩანს, კარგი ლეგიონერები ჰყავს და შესაბამისად, ამბიციაც, როგორც ყოველთვის, ამ სეზონშიც მაღალი ექნება. ჰანტერ ბოუდიმ მოგროვებული 21 ქულიდან რამდენიმე ბურთი ეფექტურად ჩააგდო, უფრო სწორად, ჩატენა, რისი გაკეთებაც ხვალ ალბათ გაუჭირდება. ბათუმს მეტოქედ კავკასია ეყოლება, რომელსაც არანაკლები ამბიცია აქვს და ამ მატჩის გამარჯვებული C ჯგუფში პირველ ადგილს და მემორიალის ნახევარფინალის საგზურს მოიპოვებს.

B ჯგუფი
ტყიბულის ორბი vs გორის ივერიონი
სტატისტიკა: 95:86

ამ ჯგუფის პირველ მატჩში ტყიბულის ორბი ქუთაისთან 25 ქულით დამარცხდა, დღეს კი ორბმა გორის ივერიონს სძლია. დარჩენილია ერთი შეხვედრა, რომელშიც გორელები ქუთაისელებს შეხვდებიან და თუკი სასურველი სხვაობით (17 ქულით) გაიმარჯვებენ, ნახევარფინალში გავლენ. ყველაზე კომფორტულ სიტუაციაში ქუთაისელები არიან, რომლებსაც ჯგუფში პირველი ადგილის დასაკავებლად ივერიონთან 16 ქულით წაგებაც კი ჰყოფნით.

რაც შეეხება თავად აღნიშნულ მატჩს, სუპერლიგის 2 დებიუტანტის დაპირისპირება უხვქულიანი გამოდგა. ორივე გუნდი შეტევაზე უფრო იყო მომართული და დაცვაზე ნაკლებს ფიქრობდა. გორელებმა მეტოქეზე 5-ით მეტი – 16 სამქულიანი ჩააგდეს, მაგრამ მაინც დამარცხდნენ. საქმე ფარქვეშიდან და საშუალო დისტანციებიდან ჩაგდებული ბურთები გახლდათ, რომელიც ორბის კალათბურთელებმა უკეთ და შესაბამისად მეტოქეზე ხშირად შეასრულეს და გამარჯვებაც მოიპოვეს.

დონტრელ მაკქუართერმა ტყიბულის გუნდს 23 ქულა და 8 მოხსნა შესძინა. 14 ქულა კენი კუპერმა მოაგროვა, ხოლო ახალგაზრდა ნიკა ნუცუბიძემ 3 სამქულიანი და ჯამში 13 ქულა მიითვალა. გორელთა სნაიპერმა ლეგიონერმა, მეტ ნორმანმა 7 სამქულიანი ჩააგდო, სულ კი თავი 31 ქულას მოუყარა, რაც გასამარჯვებლად საკმარისი არ აღმოჩნდა.

D ჯგუფი

სოხუმი საქართველო vs თსუ 
სტატისტიკა: 81:92

თსუ ერთადერთი ქართული კლუბია, რომელიც ევროტურნირებზე ასპარეზობს. ლექსო ლაფანაშვილის გაწვრთნილმა გუნდმა ფიბა-ს ჩემპიონთა ლიგის საკვალიფიკაციო ეტაპის მატჩი პორტუგალიურ ბენფიკასთან დათმო და ფიბა ევროპის თასზე გადაინაცვლა, სადაც შემადგენლობის გაძლიერება მართებს, საკუთარი თავი და ქართული კალათბურთი ღირსეულად რომ წარმოაჩინოს. თსუ-მ უკვე დაიწყო შემადგენლობის როტაცია – ერთი ამერიკელი ლეგიონერი, ლენელ ჰენრი გაუშვა და ეროვნული ნაკრების წევრი, კახა ჯინჭარაძე შეიმატა. 

სანამ შეთამაშდებიან, უნივერსიტეტელებს დრო სჭირდებათ. “ა” ლიგის გუნდ სოხუმი-საქართველოსთან მატჩმა ეს კარგად გამოაჩინა. ლეგიონერების გარეშე მოთამაშე “ა” ლიგის გუნდი საქართველოს მოქმედ ჩემპიონსა და ევროტურნირის მონაწილეს ბოლომდე ეპაექრა. სოხუმელებმა პირველი ნახევარი სულაც მოიგეს – 51:48, თუმცა დიდი შესვენების შემდეგ თსუ-მ ლიდერობა მოიპოვა და თამაშის ბოლომდე შეინარჩუნა. ეროვნული ნაკრებში რეკორდულად მეტი – 216 მატჩის ჩამტარებელი გიორგი ცინცაძე თსუ-ს თამაშს გონივრულად დირიჟორობდა და საბოლოოდ 12 შედეგიანი გადაცემა დააგროვა. მისმა თამაშმა დიდად განსაზღვრა თსუ-ს გამარჯვება, ისევე როგორც ალექსანდრე ფევაძემ, რომელიც 18 ქულითა და 13 მოხსნით გამოირჩა.

თსუ ბოლო ტურში ოლიმპს შეხვდება და გამარჯვებული დუდუ დადიანის მემორიალის ნახევარფინალში გავა. შეგახსენებთ, რომ მემორიალის ნახევარფინალში ჯგუფების გამარჯვებულები შემდეგნაირად დაწყვილდებიან:
A (მარგვეთი) – C (ბათუმი/კავკასია)
B (ქუთაისი/გორი) – D (თსუ/ოლიმპი)