სუპერლიგის მეექვსე ტური ქუთაისში ნამდვილად დრამატული და დაძაბული მატჩით დაიწყო — ტყიბულის „ორბმა“ ზედიზედ მეორე შეხვედრა ბოლო წამებზე მოიგო და გულშემატკივრებს დაუჯერებელი ემოციები აჩუქა. როგორც ჩანს, ტყიბულელებმა ბოლო წამების სენსაციური გამარჯვებები საკუთარ სავიზიტო ბარათად აქციეს. თუკი წინა ტურში, ტყიბულში, „ბლექ ფორტრესთან“ მატჩში ორბს გამარჯვება ჰენრი ვეტერის სამქულიანმა მოუტანა, ამჯერად გადამწყვეტი სიტყვა კაპიტანმა, ბექა ლომაშვილმა თქვა.
მატჩი თანაბარ და პრინციპულ ბრძოლაში მიმდინარეობდა. იმერულ დერბიში გუნდები მოედანზე ძალზე მობილიზებულნი გამოვიდნენ, მიუხედავად იმისა, რომ ტყიბულის „ორბი“ სერიოზული საკადრო პრობლემების წინაშე იდგა — ტრავმების გამო გუნდი მატჩს მხოლოდ 8 მოთამაშით ატარებდა. პირველი მეოთხედი ტყიბულის „ორბმა“ მცირე უპირატესობით, 20:14 მოიგო, თუმცა მეორე პერიოდში ქუთაისელებმა ტემპი აიყვანეს, მეოთხედი 24:18 მოიგეს და დიდი შესვენებისთვის წონასწორობა აღადგინეს (38:38). მესამე მეოთხედში ქუთაისმა ისევ მოახერხა მცირე წინ გასვლა (22:19), მაგრამ ყველაფერი დასკვნითმა, მეოთხე პერიოდმა გადაწყვიტა, სადაც „ორბმა“ 24:20 იმარჯვა და საბოლოო წარმატებასაც მიაღწია. ამ გამარჯვებაში უდიდესი როლი შეასრულა გუნდის ცენტრმა, ჯიმი ბელმა, რომელიც სამწამიან ზონაში სრულად დომინირებდა და კომენტატორებმაც სამართლიანად შეასხეს ეპითეტი — „ბელი — შეუჩერებელი“.
ქუთაისელები გამარჯვებასთან ძალიან ახლოს იყვნენ, მაგრამ ბოლო წუთზე დაშვებულმა უყურადღებობამ და უპატიებელმა შეცდომებმა თამაშის ბედი შემოაბრუნა და იმერულ დერბიში მოგება ტყიბულს გაატანა. მატჩის დასრულებამდე 40 წამით ადრე ლევან გოგიჩაიშვილმა გარღვევა ორქულიანით დაასრულა და მასპინძელი ქუთაისი 80:76 დაწინაურდა. „ორბმა“ წუთშესვენება აიღო და შეტევაში ჩარლი ბელმა ორქულიანი ჩააგდო, თან მეტოქე აიძულა, დაჯარიმებულიყო. ბელმა საჯარიმო ვერ გამოიყენა, რომელიც ქუთაისელებმა მოხსნეს და შეტევაზე გადავიდნენ. ეს იყო უმნიშვნელოვანესი მომენტი, რომლის გაცუდებაც არაფრით არ შეიძლება: ქუთაისის უკანახაზელმა ოთარ ფხაკაძემ ბურთი მარტო ათამაშა, მარტო შევიდა და ხელსაყრელი სიტუაციიდან მიზანს ააცილა. ამ ეპიზოდში ფხაკაძეს მეტი პრაგმატულობა მართებდა — ან შეტევა უნდა დაეგვირგვინებინა, ან პასი გაეცა.
ფხაკაძის ორიოდ მეტრიდან ნასროლი ლეი-აპი მიზანს, რომელიც „ორბმა“ მოიხელთა და გადამწყვეტ შეტევაზე გადავიდა. დასრულებამდე ზუსტად ერთ წამზე ნაკლებ დროში ბექა ლომაშვილმა ზუსტი სამქულიანი სროლით „ორბს“ მძიმე, მაგრამ ტკბილი გამარჯვება გაუფორმა — 81:80! დარჩენილ წამებში ქუთაისს შანსი კიდევ ჰქონდა, მაგრამ ფრეიზერმა ოხერხული სიტუაციიდან, ბრუნში ორქულიანი გააცუდა და მატჩი ტყიბულელთა მორიგი ტრიუმფით დასრულდა.
„ორბის“ რიგებში ყველაზე მეტი, 17 ქულა ჯიმი ბელიმ ჩააგდო, ჰენრი ვეტერმა გუნდს 15 ქულა შემატა, ხოლო ლუკა ხარაბაძემ 12 ქულა მიითვალა. რაც შეეხება ქუთაისელებს, აქ ყველაზე შედეგიანი ანტონიო პატერსონი იყო 14 ქულით, მაიკლ ფრეიზერმა 13 ქულა დააგროვა, ხოლო ანზორ ნადირაძემ და ვილი ისიანმა 12-12 ქულა ჩააგდეს.
სუპერლიგის მეექვსე ტური ხვალ გრძელდება — შაბათს ბათუმსა და თბილისში თითო მატჩი გაიმართება. „ბათუმი“ საკუთარ არენაზე თსუ-ს უმასპინძლებს, ხოლო თბილისში, დიღმის არენაზე, „ბლექ ფორტრესი“ „რუსთავს“ შეხვდება.
