ნაკრები-ბასტიონმა ჩემპიონობა დაძაბულ ბრძოლაში მოიპოვა

გალერეა თამაშისთვის განკუთვნილი 40 წუთი და ამას დამატებული 2 ოვერტაიმი – ქალთა ლიგის ფინალი უაღრესად დაძაბული და დრამატული გამოდგა. ლელა ცანავას გაწვრთნილმა „ნაკრები-ბასტიონმა“ გოგონათა თრილერში დაამარცხა „ვეჯინი“ და საქართველოს ჩემპიონი გახდა.
მიმდინარე სეზონში ოვერტაიმი გოგონათა ჩემპიონატებში აქამდე არ დაფიქსირებულა. დღევანდელ ფინალურ მატჩში კი ძირითადი დრო ხომ ფრედ დასრულდა, არც პირველმა დამატებითმა 5-წუთეულმა ვერ გამოავლინა გამარჯვებული. მეორე დამატებით ხუთწუთეულში „ნაკრები-ბასტიონის“ გუნდმა მოახერხა და გამარჯვებამდე მივიდა, რაც უპირველესად ნატალი ოთხმეზურის დამსახურებაა.
სხარტმა, მოქნილმა და გონივრულად მოთამაშე ნატალიამ მთელი თამაში უმაღლეს დონეზე ჩაატარა, თუმცა განსაკუთრებით გამოსარჩევია მისი თამაში ბოლო პერიოდში, როცა ბასტიონელებმა ჩამორჩენა გააბათილეს. „ვეჯინი“ ნიადაგ იგებდა – 6, 8 და 11 ქულით. მატჩის ძირითადი დროის 39 წუთი წინ ვეჯინელები იყვნენ. ბასტიონი-ნაკრების გოგონებმა მხოლოდ ბოლო წამებზე მოახერეს გათანაბრება და ერთი დამატებითი 5-წუთეულის შემდეგ ვეჯინელთა წინააღმდეგობა გატეხეს.
„ნაკრები-ბასტიონს“ 50 ქულით ნატალია ოთხმეზურმა ულიდერა. 14 ქულა დააგროვა გვანცა ბოჭორიშვილმა. დამარცხებულთაგან 28 ქულით ნათია ფუტკარაძე გამოირჩა.
მატჩის შემდეგ გამართულ დაჯილდოვების ცერემონიალზე მეორე ადგილზე გასული ვეჯინელები კალათბურთის ფედერაციის ქალთა კალათბურთის დეპარტამენტის კოორდინატორმა, ვალენტინ დერიუგინმა დააჯილდოვა. დერიუგინს პირველადგილოსანთა დაჯილდოვებაში შეუერთდა ვეტერანი კალათბურთელი ლიკა ქაჯაია. საჩემპიონო თასის მისაღებად „ბასტიონი-ნაკრების“ კაპიტანმა თეონა მაჩალაძემ მატჩის გმირი, ნატალია ოთხმეზური გამოიხმო და გამარჯვებულები ზღვა სიხარულში გადაეშვნენ.
მესამე ადგილზე ქუთაისი გავიდა, რომელმაც ფინალურ შერკინებამდე გამართულ მატჩში 60: 53 დაამარცახმეტა და ბრინჯაოს მედლებს დაეპატრონა.