საქართველოში გოგონათა კალათბურთის განვითარება ახალ ეტაპზე გადადის | თანამშრომლობა FIBA-სთან

საქართველოს კალათბურთის ეროვნული ფედერაცია რეგიონებში კალათბურთის განვითარების პროგრამას ახალ მასშტაბს სძენს. აღნიშნულმა პროგრამამ გაფართოება განიცადა და მასში გოგონათა საკალათბურთო სკოლებიც სრულფასოვნად ჩაერთნენ, რაც ფიბა-ს გოგონათა კალათბურთის განვითარების გლობალური პროგრამის – Her World, Her Rules („გოგონათა სამყარო, გოგონათა წესები“) ფინანსური მხარდაჭერითა და ტრანშის ათვისებით გახდა შესაძლებელი.

აღსანიშნავია, რომ უკვე მეოთხე წელია, საქართველოს კალათბურთის ფედერაცია ფიბა-სთან ახალგაზრდობის განვითარების პროგრამასთან (YDF) თანამშრომლობით ახორციელებს საქართველოში რეგიონების განვითარების პროექტს, რომელიც მიმდინარე წლამდე მხოლოდ ვაჟთა კალათბურთს მოიცავდა. რეგიონული დეპარტამენტის ხელმძღვანელის, შალვა ონიანის ინიციატივითა და ფედერაციის სრული მხარდაჭერით, მჭიდრო თანამშრომლობა დაიწყო ფიბა-ს გოგონათა კალათბურთის განვითარების ფონდთანაც (HWHR), რამაც პროექტს ბევრად მასშტაბური სახე მისცა და მან გოგონათა კალათბურთიც მოიცვა.

ახალი მასშტაბური ინიციატივის ფარგლებში, რეგიონული განვითარების დეპარტამენტთან ერთად, პროექტში საქართველოს კალათბურთის ფედერაციის კიდევ ორი სტრუქტურული ერთეული – 3×3 კალათბურთისა და ქალთა კალათბურთის განვითარების დეპარტამენტები ჩაერთვნენ. სწორედ ამ სამი დეპარტამენტის ერთობლივი ორგანიზებით, თბილისში, ვერის ბაღის საკალათბურთო დარბაზში 3×3 კალათბურთში 15-წლამდე გოგონათა შორის პირველი საპილოტე ტურნირი ჩატარდა.

ტურნირში ექვსმა გუნდმა მიიღო მონაწილეობა და შეხვედრები საკმაოდ აზარტულ, საინტერესო და მოზარდებისთვის სახალისო გარემოში წარიმართა. ყველა მონაწილეს საჩუქრად სპეციალური სათამაშო ფორმები დაურიგდა, ხოლო საპრიზო ადგილებზე გასული გუნდები, მედლებთან ერთად, სხვადასხვა სახის სპეციალური პრიზებითა და საჩუქრებით დაჯილდოვდნენ.

ვერის ბაღში გამართული ტურნირი მხოლოდ დასაწყისია. პროექტი დედაქალაქიდან დაიწყო და ეტაპობრივად მთელ საქართველოს მოიცავს. პროგრამის მთავარი მიზანია არა მხოლოდ ტურნირების ორგანიზებით, არამედ შესაბამისი მატერიალურ-ტექნიკური ბაზით უზრუნველყოფის გზით ქვეყნის მასშტაბით გოგონათა კალათბურთის პოპულარიზაციასა და განვითარებას ჩაუყაროს საფუძველი.