გუშინ თსუ-მ ფაქტობრივად მოგებული მატჩი წააგო ახალციხესთან და მიმოხილვაში დავწერეთ, რომ ესეთი რამ შესაძლოა, მთელი სეზონი გავიდეს და აღარ მოხდესო. ბედის ირონია დავარქვათ თუ დღეს მომხდარ საოცარ ამბავს სხვა ეპითეტი უფრო მიესადაგება, მაგრამ ფაქტია: მთელი სეზონი კი არა, მომდევნო მატჩი კიდევ უფრო სენსაციური აღმოჩნდა. თუკი 9 ქულით ჩამორჩენილმა ახალციხემ დარჩენილ 105 წამში მოახერხა თსუ-ს დამარცხება, დღეს ორბმა ბლექ ფორტრესს 90 წამში 10 ქულა გაუბათილა და გაიმარჯვა.
ეს იყო წმინდა წყლის სასწაული. ვიცით, რომ კალათბურთში წარმოუდგენელი მატჩები თამაშდება და უარესებიც მომხდარა, მაგრამ სწორედ ასეთ მატჩებს ვუწოდებთ სენსაციას. მოკლედ, ბოლო პერიოდის დასრულებამდე 1:39 წუთით ადრე 67:77 ჩამორჩენილმა ორბმა ბურთი თავისი ნახევრიდან შემოიტანა და ჰენრი ვეტერმა სამქულიანი რომ ჩააგდო, საფინალო სირენამდე 88 წამი იყო.
ეს სამიანი იყო ზღვაში წვეთი, რადგან ბლექ ფორტრესს 7-ქულიანი ფორა და შეტევა დარჩა. მჭიდრო პრესინგით ტყიბულელებმა ბურთი ჩაჭრეს და ჯიმი ბელმა ეგრედ წოდებული AND1 (2+1) მიითვალა – 73:77. და აქ მოხდა ის, რომ ლუკა კალატოზიშვილმა სერგი ნინუას პასით საშუალო მანძილიდან იხეირა და ფორტრესელები დასრულებამდე 46 წამით ადრე 6 ქულით დაწინაურდნენ. ორბის კაპიტანმა ბექა ლომაშვილმა უმნიშვნელოვანესი სამქულიანი დასრულებამდე 35 წამით ადრე ჩააგო, ჩამორჩენა 3 ქულამდე შემცირდა და მასპინძლები ისევ პრესინგზე გადაერთნენ. ამან გაჭრა, ორბმა ბურთი მოიპოვა და ვეტერმა გამთანაბრებელი სამქულიანი ჰენრი ვეტერმა სირენამდე 4.2 წამით ადრე ჩააგდო.
ყველა ოვერტაიმზე ფიქრობდა, თუმცა იმავე კალატოზიშვილმა სამწამიანში მიღებული ბურთი კარგად დაამუშავა და კაუჭით ორქულიანი მიითვალა. ეს მოხდა სირენამდე 0.4 წამით ადრე და ჩაგდებული ბურთი მისმა ავტორმა ისე აღნიშნა, თითქოს ყველაფერი დასრულდა. სანამ მსაჯები ვიდეოგამეორებაზე დროს აზუსტებდნენ, ბლექ ფორტრესი ზეიმობდა. ვიდეოანალიზის შემდეგ არბიტრებმა დრო 1.2 წამამდე ასწიეს, რაც სრულიად საკმარისი აღმოჩნდა, მატჩის გმირ ჰენრი ვეტერს საფინალო სირენის თანხლებით გამარჯვების სამქულიანი ჩაეგდო – 82:81 (სტატისტიკა).
მატჩის ინდივიდუალური სტატისტიკისა და მექულეთა მონაცემებით, გამარჯვებული „ორბის“ რიგებში გამოირჩნენ: ჰენრი ვეტერი (22 ქულა, 12 მოხსნა, 5 პასი), ჯიმი ბელი (14 ქულა, 10 მოხსნა), ბექა ლომაშვილი (13 ქულა) და დავით ტრაპაიძე (10 ქულა). რაც შეეხება „ბლექ ფორტრესს“, გუნდს ულიდერეს: ლუკა კალატოზიშვილი (22 ქულა, 16 მოხსნა), სერგი ნინუა (15 ქულა, 8 პასი), დელანო სპენსერი (16 ქულა, 7 პასი) და ვახტანგ ქადარია (12 ქულა).
სუპერლიგის მე-5 ტურის ბოლო შეხვედრა თელავში გაიმართება, სადაც მასპინძლები ქუთაისს დაუპირისპირდებიან.
