დუაიტ ჰოვარდი საქართველოს სუპერლიგაში ითამაშებს. დღეს ლეგენდარულმა ამერიკელმა ცენტრმა, რომელსაც მისი შეუზღუდავი შესაძლებლობების გამო „სუპერმენად“ მოიხსენიებენ, საქართველოს სუპერლიგის კლუბ „ბლექ ფორტრესთან“ კონტრაქტი გააფორმა და სულ მალე ქართველი გულშემატკივრის წინაშე წარდგება.
NBA-ის ჩემპიონი და დიდების დარბაზის წევრი, „ოლ სტარის“ 8-გზის მონაწილე და ზედიზედ სამი სეზონის განმავლობაში პლანეტის უძლიერესი ლიგის საუკეთესო დამცველად აღიარებული 40 წლის კალათბურთელი დღეს საკუთარი ინსტაგრამის გვერდით წარდგა ქომაგების წინაშე და ოფიციალურად დაადასტურა, რომ საქართველოში მოდის და თბილისური აუდიტორიის წინაშე „ბლექ ფორტრესის“ მაისურით ითამაშებს.
მას შემდეგ, რაც NBA-ში კარიერა დაასრულა, ჰოვარდი სათამაშოდ ტაივანში წავიდა. იგი სპეციალური ტურნეს მეშვეობით სხვადასხვა საერთაშორისო ტურნირზე გამოდიოდა და ძირითადად გუნდებთან მოკლევადიან კონტრაქტებს აფორმებდა. ამჯერად მან ქართულ კლუბთან ერთთვიან შეთანხმებას მოაწერა ხელი. ამ პროექტის ფარგლებში 40 წლის კალათბურთელი ბოლოს მონღოლეთს ეწვია და SG Apes-ის შემადგენლობაში იასპარეზა.
ახლა იმაზეც ვთქვათ, „ბლექ ფორტრესი“ როგორ აღმოჩნდა სუპერლიგაში, როცა გუნდი გასული სეზონის „ა“ ლიგის ნახევარფინალში „ლიბერთისთან“ დამარცხდა. ფორტრესელები გაერთიანდნენ სუპერლიგის კლუბ „რაშთან“, რომლისგანაც გუნდის დასახელების ექსკლუზიური უფლება მიიღეს. თავად „ლიბერთიც“, რომელმაც ფინალში „კასპის გრიფინი“ დაამარცხა და სუპერლიგის საგზური მოიპოვა, „ა“ ლიგიდან გავარდნილ „ახალციხესთან“ გაერთიანდა და მომავალ სუპერლიგაში სამცხე-ჯავახეთის რეგიონს „ახალციხის“ სახელით წარმოადგენს.
დუაიტ ჰოვარდი ერთადერთი კალათბურთელია, რომელმაც ნბა-ს სეზონის საუკეთესო დამცველის ტიტული ზედიზედ სამ სეზონში (2008-2009, 2009-2010, 2010-2011) აქვს მოგებული.
