საქართველოს 2001 წელს დაბადებულთა ნაკრები ევროპის ახალგაზრდულ ლიგაში ჩაება. ლიგის მონაწილე 16 გუნდიდან 7-მა თავი ლატვიის დედაქალაქ რიგაში მოიყარა, სადაც 22-25 ოქტომბერს პირველი ეტაპი გაიმართება.
გათამაშების ფორმატის თანახმად თითოეული გუნდი რიგაში 5 მატჩს გამართავს. საქართველოს ნაკრებმა დღეს, 23 ოქტომბერს 2 შეხვედრა ჩაატარა და თითო მოგებ-წაგება მიითვალა. შუადღისით ქართველები ესტონურ „აუდიენტასს“ შეხვდნენ და დაძაბულ ბრძოლაში – 42:45 დამარცხდნენ.
მატჩის ბედი ბოლო წამებზე გადაწყდა. ტალინელებმა მესამე მეოთხედის ბოლოსთვის მოპოვებული ლიდერობა შეინარჩუნეს. არადა, საქართველოს ნაკრებმა ბოლო ათწუთეული 15:9 მოიგო, თუმცა ამით ჩამორჩენა მხოლოდ 3 ქულამდე შეამცირა. აღნიშნულ მატჩში ქართველთაგან 10 ქულით ბომბარდირი გახდა ირაკლი სულხანიშვილი, გიგი ტაბაღუამ კი 15 წუთში 2 ქულა, 2 ჩაჭრა, 7 მოხსნა და 1 პასი მიითვალა.
მეორე შეხვედრა ლატვიის დროით საღამოს 6 საათზე გაიმართა. ნოდარ ქორქიასა და ირაკლი მაისურაძის გუნდის მეტოქე ადგილობრივი „რიგა“ იყო, რომელიც ქართველებმა დაძაბულ ბრძოლაში – 52:50 დაამარცხეს. ოთხივე პერიოდი თითქმის თანაბარი იყო, შესაბამისად, მატჩის ბედიც ბოლო წუთებზე, საქართველოს ნაკრების სასარგებლოდ გადაწყდა.
ქართველთაგან 19 ქულით და 11 მოხსნით საუკეთესო იყო ლაშა მიქელაძე, გიორგი ჭეიშვილის ანგარიშზე კი 11 ქულა დაგროვდა. 8-8 ქულა მიითვალეს მიხეილ ზურაბაშვილმა და რატი ანდრონიკაშვილმა. აღსანიშნავია, რომ ამ უკანასკნელმა მხოლოდ 8 წუთი ითამაშა.
ხვალ ქართველები 2 რუსულ გუნდს – ცსკა-სა და „ტრინტას“ შეხვდებიან, რომლებმაც საქართველოს ნაკრების მსგავსად დღეს თითო მოგებ-წაგება მიითვალეს.
