18-წლამდელთა „ბ“ ლიგით დასრულდა თბილისის კალათბურთის განვითარების კავშირისა და საქართველოს კალათბურთის ეროვნული ფედერაციის თანამშრომლობით ჩატარებული სეზონი. აღნიშნული თანამშრომლობის საფუძველზე 14, 16 და 18-წლამდელებში სეზონის დასაწყისში თბილისის ჩემპიონატები ჩატარდა, რის შემდეგაც აღნიშნულ ასაკებში „ბ“ ლიგად წოდებული ჩემპიონატები გაიმართა, სადაც იმ გუნდებმა მიიღე მონაწილეობა, რომლებიც კონკრეტულ ასაკებში საქართველოს ეროვნულ ჩემპიონატებში ვერ მოხვდნენ.
18-წლამდელთა „ბ“ ლიგის გამარჯვებული გახდა „რუსთავი“, რომელმაც ფინალური სერია საერთო ანგარიშით – 2:0 მოუგო „იბერს“. რუსთაველებმა სერიის პირველი შეხვედრა 72:65 მოიგეს, ხოლო მეორეში 69:62 იმარჯვეს და ჩემპიონები გახდნენ. რუთაველებს საკმაოდ ძლიერი გუნდი ჰყავდათ და სავარაუდოდ, საქართველოს ჩემპიონატშიც კონკურენტუნარიანად იასპარეზებდნენ, თუმცა სეზონის წინ გუნდი რამდენიმე წამყვანმა მოთამაშემ დატოვა და მწვრთნელებმა – ირაკლი მებურიშვილმა და გურამ რეხვიაშვილმა გადაწყვიტეს, „ბ“ ლიგაში ეასპარეზათ.
სეზონის საუკეთესო მოთამაშედ ბექა ლომაშვილი დასახელდა, რომელიც ფინალური მატჩის შემდეგ თბილისის კალათბურთის განვითარების კავშირის აღმასრულებელმა დირექტორმა ზაზა ღონღაძემ სპეციალური პრიზით დააჯილდოვა. პრიზიორებს მედლები და სიგელები ზაზა ღონღაძემ და კავშირის წევრმა დავით გოცირიძემ გადასცეს, ხოლო საჩემპიონო თასი რუსთაველებმა ტრადიციულად კავშირის პრეზიდენტ პაატა გურასპაულისგან ჩაიბარეს.
