2004 წლიანთა ფესტივალის ნახევარფინალში გუნდები დაწყვილდნენ

თბილისის 2004 წელს დაბადებულთა მინისაკალათბურთო ფესტივალზე ნახევარფინალისტები გამოვლინდნენ. დღეს, საკალათბურთო აკადემიაში 4 მეოთხედფინალური მატჩი გაიმართა, რომელშიც მონაწილეობა იმ გუნდებმა მიიღეს, რომლებმაც ჯგუფური ეტაპი წარმატებით დაძლიეს.
ჰიუნდაიმ, რომელმაც „ა“ ჯგუფში პირველი ადგილი დაიკავა, იოლად სძლია „ვარსკვლავებს“ და ნახევარფინალში გავიდა. საუკეთესო ოთხეულში მოხვდნენ იბერი და აკადემიის პირველი გუნდი, რომლებმაც მეტოქეებს დიდი გართულების გარეშე, იოლად სძლიეს. მეოთხე ნახევარფინალისტი ოვერტაიმია, რომელმაც მეოთხედფინალურ ჯახში თსსუ-ს 35:26 სძლია.
ნახევარფინალური მატჩები ხვალ, 22 ივნისს, საკალათბურთო აკადემიაში გაიმართება.