წუხელ, ღამის 3 საათზე, მიუნხენის რეისით თბილისში ბელგიისა და საქართველოს ნაკრებები ერთად ჩამოვიდნენ. ჩვენი გუნდი ბულგარეთ-პოლონეთში გადატანილი ბრძოლებიდან ბრუნდებოდა, ბელგია კი შინიდან მოემართებოდა და თბილისში ჩვენთან სათამაშოდ ჩამოვიდა. ბელგიელები გასულ ტურში ისვენებდნენ, ხოლო იმის წინაში, რომელშიც ქართველებმა ბულგარეთს სძლიეს, ბენილუქსელები პოლონეთში 20 ქულით განადგურდნენ.
ბელგიელებსა და ქართველებს თბილისის აეროპორტში „რუსთავი 2“-სა და „ტელე იმედის“ წარმომადგენლები დახვდნენ, ესაუბრნენ და შემდეგ ორივე ნაკრებმა სასტუმროსკენ აიღო გეზი. ბელგიელები კალათბურთის ფედერაციის ტექნიკური სპონსორის – „ქორთიარდ მარიოტის“ სასტუმროში დაბინავდნენ. გზაში კი ტრადიციულად მეტოქე გუნდის მწვრთნელს გავესაუბრეთ, რომელმაც ერთი ჩვენთვის არასასიამოვნო ამბავი გვამცნო – ქართველებთან დიჯეი (დიდიე) მბენგა ითამაშებსო. მიუხედავად იმისა, რომ ეს ტომით კონგოელი, გასულ სეზონში „ლოს ანჯელეს ლეიკერსში“ ნათამაშევი კალათბურთელი ამერიკაშია და ახალ კლუბს ეძებს, ბელგიელთა თავკაცის, ედი კასტილსის განცხადებით ის 20 აგვისტოს ქართველების წინააღმდეგ სათამაშოდ გავა.
ბელგიის მთავარი მწვრთნელი ედი კასტილსი
– შემადგენლობაში რამე ცვლილებები ხომ არაა? – დავეკითხეთ კასტილსს.
– არა, იგივე შემადგენლობით ვართ, როგორც წინა მატჩებში.
– დიჯეი მბენგა ისევ გაკლიათ?
– მბენგამ ევროშესარჩევის საწყისი 4 მატჩი გამოტოვა, მაგრამ ის დარჩენილ 4 შეხვედრაში დაგვეხმარება, რაც ძალიან სასიხარულოა.
– ანუ ხვალ საქართველოს წინააღმდეგ ითამაშებს?
– დიახ, ის ბელგიაში არ იყო და საქართველოში სხვა რეისით მოდის.
სანამ ბელგიელთა მწვრთნელთან დანარჩენ საუბარს გაგაცნობდეთ, ერთ უცნაურ ფაქტზე შევჩერდებით. მოგვიანებით, როცა ბელგიელები სასტუმროში შევიდნენ, მათი გუნდის მენეჯერს ტრადიციულად შემადგენლობა ვთხოვე. მათი დელეგაციის ერთ-ერთმა წევრმა 12-კაციანი შემადგენლობა გადმომცა და მათ შორის არ იმყოფებოდა დიდიე მბენგა. ვკითხე, ეს მოთამაშეები იქნებიან საქართველოსთან მატჩში, თუ მოსალოდნელია, რამე ცვლილება მოხდეს თქო. არა, ეს 12 კაცი გვეყოლება თამაშზეო – იყო პასუხი.
რა გამოვიდა, მწვრთნელი ამბობს, ხვალ ამერიკიდან მბენგა გვიერთდება და ეს დელეგაციის წევრებმა არ იციან?! ინფორმაციის გადასამოწმებლად ბელგიელთა დელეგაციის კიდევ 2 წევრს დავუსვი კითხვა – ხვალ მბენგა ითამაშებს? ის ჩვენთან არ არის და როგორ ითამაშებსო, მივიღე პასუხად. ერთი სიტყვით, მბენგა თბილისში არაა და ბელგიელთა მწვრთნელის თქმით, ის დღეს ჩამოდის, რის შესახებაც დელეგაციის წევრებმა არაფერი იციან.
– უყურეთ პოლონეთი-საქართველოს შეხვედრა? – გავნაგრძობთ კასტილსთან საუბარს.
– ჯგუფის 2 ფავორიტის მატჩს რა თქმა უნდა უმეთვალყურეოდ არ დავტოვებდი. ვუყურე და დავრწმუნდი, რომ პოლონეთთან სტუმრად თამაში ძალიან ძნელია. მარკოიშვილი რომ არა, სხვაობა გაცილებით დიდი იქნებოდა მასპინძელთა სასარგებლოდ.
– ანუ თვლით, რომ საქართველომ გუნდურად ვერ ითამაშა?
– მაგას არ ვამბობ, უბრალოდ, ბოლო მეოთხედში მარკოიშვილმა დიდი ოსტატობა გამოიჩინა და ძალიან საკვანძო ბურთები ჩააგდო, რამაც საქართველოს დიდი სხვაობით დამარცხება ააცილა თავიდან. მანუჩარი მე ჯერ კიდევ მაშინ გავიცანი, როცა ის 15 წლის იყო. ტრევიზოს ცნობილ კემპზე მარკოიშვილმა მთელი ევროპის სკაუტები მოხიბლა, შემდეგ კი ის სწორედ ტრევიზოს „ბენეტონში“ ჩაირიცხა, სადაც ნიკოლოზ ცქიტიშვილიც თამაშობდა.
– პოლონეთში 20 ქულით დამარცხებაზე რას იტყვით?
– პოლონეთმა ძალიან მძლავრად გვეთამაშა. ჩვენ თითქმის სამი მეოთხედის განმავლობაში კი ვუძალიანდებოდით, მაგრამ ბოლოს მასპინძლებმა თავისი გაიტანეს.
– ჩვენს ჯგუფში ისეთი სიტუაციაა შექმნილი, რომ ვინ გავა პირველ ადგილზე, ალბათ ვერავინ იტყვის…
– ჩვენ თბილისში მოსაგებად ვართ ჩამოსულნი და თუ ეს მოვახერხეთ, პირველზეც ალბათ ჩვენ გავალთ.
– შეგახსენებთ, რომ თვენმა 20 ქულით მომგებმა პოლონეთმა თბილისში 19 ქულა წააგო…
– ეგ ჩვენ არ გვაბრკოლებს, გასულ შედეგებს არ ვუყურებთ.
ახლა კი გაგაცნობთ იმ მოთამაშეების სიას, რომელიც ბელგიელთა დელეგაციის ერთ-ერთმა ხელმძღვანელმა, გუნდის მენეჯერმა მოგვცა და რომელშიც დიდიე მბენგა არ გახლავთ:
4 როელ მურსი
5 სემ ვან როსომი
6 კრისტოფ ბეგინი
7 ალექს ერველი
8 რენდი ოვენეკე
9 ჯეფ ვან დერ იონკჰეიდი
10 დიმიტრი ლოუერსი
11 იანიკ დრესენ
12 ბეიე ტაბუ-ებომა
13 გაი მუია
14 ტომას ვან დერ შპიგელი
15 მარკუს ფეისონი
ბელგიელები დღეს სპორტის სასახლეში 17 საათზე ივარჯიშებენ, ხოლო ხვალ, თამაშის დღეს, 10-დან 11 საათამდე მსუბუქად მოითელებიან.
ქართული ტელევიზიები თავდაპირველად ზაზა ფაჩულიას გაესაუბრნენ
ბელგიელთა 2 იმედი: ვან დერ შპიგელი და ალექს ერველი
ბელგიელები თბილისის აეროპორტში
ბელგიელთა ერთ-ერთი ლიდერი ალექს ერველი
ბელგიელები “ქორთიარდ მარიოტში”
