საქართველოს ეროვნული ნაკრების ყველაზე ახალგაზრდა წევრი, 18 წლის გოგა ბითაძე, მნიშვნელოვნად პროგრესირებს. ქართველმა ცენტრმა სერბულ “მეგა ბიმაქსში” დღეს პირადი რეკორდი დაამყარა. მისმა გუნდმა ადრიატიკის ლიგაში ხორვატულ “ცედევიტასთან ” ზაგრებში ითამაშა და ამ მატჩში ბითაძემ 23 ქულა მოაგროვა.
“მეგა ბიმაქსი” დაძაბულ ბრძოლაში – 73:75 დამარცხდა, ქართველი კალათბურთელი კი ორივე გუნდის შემადგენლობაში საუკეთესო შედეგი ჰქონდა. ბითაძე სასტარტო ხუთეულში გამოჩნდა და 29:59 წუთში 23 ქულა, 6 მოხსნა (3 შეტევაში), 2 პასი და 2 დაფარება მიითვალა. გოგამ 13-დან 9 ორქულიანი, 2-დან 1 სამქულიანი და 2-ვე საჯარიმო ჩააგდო, ბურთი ერთხელ დაკარგა, 3 პერსონალური ფოლი მიიღო, მის წინააღმდეგ კი 4-ჯერ დაჯარიმდნენ. შედეგად, ქართველი ლეგიონერის სარგებლიანობის კოეფიციენტი 30-ს გაუტოლდა და ის შეხვედრის უძვირფასესი მოთამაშე გახდა.
“მეგა ბემაქსმა” 5 მოგებითა და 12 მარცხით ადრიატიკის ლიგაში მე-9 ადგილზე გადაინაცვლა, მომდევნო შეხვედრას კი 30 იანვარს აშკარა აუტსაიდერ “მზტ სკოპიესთან” ჩაატარებს და აუცილებლად გამარჯვებისთვის უნდა იბრძოლოს.
