გოგონათა ნაკრების მოგებ-წაგება ლატვიაში

ლატვიაში საწვრთნელ შეკრებაზე მყოფმა საქართველოს 16 წლამდე გოგონათა ნაკრებმა მორიგი სპარინგ-მატჩები გამართა. ლელა ცანავასა და როლანდ გელოვანის გაწვრთნილმა გუნდმა ადგილობრივ კლუბებთან 2 შეხვედრა ჩაატარა, საიდანაც ერთში დამარცხდა, ხოლო მეორეში გამარჯვება მოიპოვა.
წარუმატებელი იყო ქართველების მატჩი „იურმალასთან“. ცნობილი მუსიკალური ფესტივალის მასპინძელი ქალაქის გუნდმა საქართველოს 16-წლამდელთა ნაკრები 66:31 დაამარცხა. თავის მხრივ, ქართველებმა დიდი ანგარიშით მოიგეს ლატვიაში ჩატარებული კიდევ ერთი მატჩი. ცანავას გუნდმა კლუბ „ტუკუმსი“ 82:34 გაანადგურა.
ამით საქართველოს 16 წლამდე გოგონათა ნაკრებმა სპარინგ-მატჩები დაასრულა და გეზს საქართველოსკენ აიღებს. ლელა ცანავასა და როლანდ გელოვანის გუნდი თბილისში 4 აპრილს დაბრუნდება.