ევროპის ჩემპიონატის მეორე ფინალისტიც ცნობილია. ესპანეთს, რომელმაც ნახევარფინალიდან მასპინძელი საფრანგეთი გამოაგდო, ჩემპიონობას ლიტვა შეეცილება. ბალტიურმა გუნდმა დაძაბულ ბროლაში ტურნირის ერთ-ერთი ფავორიტი სერბეთი 67:64 დაამარცხა და კონტინენტის პირველობის ფინალშიზედიზედ მეორედ გავიდა.
ლიტვა ის გუნდია, რომელმაც პლეი ოფის პირველ, მერვედფინლურ რაუნდში საქართველო 4 ქულით – 85:81 დაამარცხა. იმ მატჩს ბალტიელები უმეტესწლად აგებდნენ და რომ იტყვიან, ბეწვის ხიდზე გაიარეს. ლიტველებს ისეთივე წარმატებით შეეძლოთ ქართველებთან წაგება, როგორც მოიგეს. იმ გამარჯვების შემდეგ ლიტველებმა კიდევ 2 დაძაბული ჯახი გადაიტანეს – იტალიას ოვერტაიმში მოუგეს, ხოლო წუხელ სერბეთთან დრამატულ ფინალში 3 ქულით იმარჯვეს.
ლიტვა მოგებას იმსახურებდა, რადგან ევროპის ერთ-ერთ გრანდ სერბეთს ნიადაგ უგებდა და ისე გამართულად თამაშობდა დაცვა-შეტევაში, ალექსანდრ ჯორჯევიჩის გუნდს წარმატების შანსი არ მისცემია. ლიტვაში 15 ქულით იონას ვალანჩუნასი გამოირჩა, თუმცა საუკეთესო შედეგი მინდაუგას კუზმინსკასმა დააფიქსირა – 13 ქულა, 9 მოხსნა. 12 ქულით და 9 პასით მანტას კალნიეტისი გამოირჩა.
ამასობაში გაირკვა ის ბოლო გუნდი, რომელმაც ოლიმპიდის საკვალიფიკაციო ტურნირში მონაწილეობის უფლება მოიპოვა. ესაა ჩეხეთი, რომელმაც 97:70 გაანადგურა ლატვია და ევრობასკეტზე მე-7 ადგილი დაიკავა.
ფინალურ მატჩში, 20 სექტემბერს, ერთმანეთს ლიტვა და ესპანეთი დაუპირისპირდებიან. ლიტვა ევრობასკეტის მოქმედი ვერცხლის პრიზიორია, ესპანეთი კი ბრინჯაოს მედლების მფლობელი.
