საქართველოს ეროვნული ნაკრების ნატურალიზებულმა უკანახაზელმა მარკის რიდმა თურქეთის საკალათბურთო სუპერლიგის მიმდინარე გათამაშებაში თავისი საუკეთესო და ყველაზე შედეგიანი შეხვედრა ჩაატარა, თუმცა მისმა ძალისხმევამ „ბაჰჩეშეჰირი“ მარცხისგან მაინც ვერ იხსნა.
სუპერლიგის მე-6 ტურში სტამბოლური კლუბი სტუმრად „ბორდო ბანდირმას“ დაუპირისპირდა და დაძაბულ ბრძოლაში, ანგარიშით 88:103 დამარცხდა. აღსანიშნავია, რომ ეს „ბაჰჩეშეჰირისთვის“ საკვანძო მარცხი აღმოჩნდა, რადგან გუნდმა ჩემპიონატში სეზონის პირველი წაგება იწვნია.
მიუხედავად გუნდის წარუმატებლობისა, პარკეტზე საუკეთესო სწორედ საქართველოს ნაკრების ლეგიონერი იყო. 31 წლის ამერიკელმა მცველმა სტუმართა რიგებში ყველაზე მეტი — 21 ქულა მოაგროვა. რიდმა სროლებში კარგი სიზუსტე აჩვენა: მან 4-დან 2 სამქულიანი და 10-იდან 6 ორქულიანი გამოიყენა, რასაც 3 ზუსტი საჯარიმოც მიუმატა. გარდა ქულებისა, მარკისმა გუნდს 3 შედეგიანი გადაცემა და 3 ჩაჭრაც შესძინა.
მიუხედავად ამ მარცხისა, 5 მოგებითა და 1 წაგებით „ბაჰჩეშეჰირი“ კვლავ თურქეთის სუპერლიგის სატურნირო ცხრილის სათავეში რჩება. მარკის რიდის გუნდი მორიგ მატჩს სულ მალე გამართავს — 3 ნოემბერს სტამბოლელები ევროთასის ფარგლებში გერმანულ „ულმს“ ესტუმრებიან, ხოლო შიდა ჩემპიონატს 8 ნოემბერს დაუბრუნდებიან, სადაც საკუთარ არენაზე „დენიზლი ბასკეტს“ უმასპინძლებენ.
