მანუჩარ მარკოიშვილისთვის და მისი “გალათასარაისთვის” ევროსეზონი დასრულდა. სტამბოლურმა კლუბმა მეოთხედფინალური სერიის მესამე მატჩიც წააგო კატალონიურ “ბარსელონასთან” და საერთო ანგარიშით – 0:3 დამარცხდა.
სტამბოლელებმა კატალონიურ გრანდს დიდი ბრძოლა გაუმართეს და მხოლოდ ბოლო წამებზე, მცირე სხვაობით წააგეს. კარლოს აროიოს ყველა პირობა ჰქონდა საიმისოდ, რომ მატჩის გმირი გამხდარიყო, მაგრამ ბოლო წუთზე, როცა მისი “გალა” 1 ქულით ჩამორჩებოდა, პუერტორიკოელი უკანახაზელის ნასროლს ბარსელონელმა ჯო დორსიმ დააფარა და…
სტამბოლელებს მაინც შერჩათ შანსი, ბრედ ოლესონმა მხოლოდ 1 საჯარიმო ჩააგდო და “გალათასარაის” 2 ქულის გასაბათილებლად 10 წამი დარჩა. წუთშესვენების შემდეგ მარკოიშვილს ბურთი გვერდითი ხაზის მიღმიდან გამოჰქონდა. მას თანაგუნდელები ვერ გაეხსნენ, ხოლო ქართველმა მოთამაშემ ბურთის შემოსატანად განკუთვნილი დროის ბოლო, მე-5 წამზე განწირული პასი გასცა, რომელიც ოლესონმა ჩაჭრა და საჯარიმოს ხაზზე აღმოჩენილმა ორივე სროლა ჩააგდო, რითაც ყველაფერს წერტილი დაუსვა – 9 წამში 4 ქულის გაბათილება ფანტასტიკის სფეროდან იყო.
მიუხედავად ამისა, სტამბოლელებმა ბოლომდე იბრძოლეს და მარკოიშვილს შეეძლო, სასწაული მოეხდინა, თუმცა ცენტრიდან ნასროლმა მისმა გამთანაბრებელმა ბურთმა კატალონიელთა ფარამდე ვერ მიაღწია – 78:75 “ბარსას” სასარგებლოდ.
სტამბოლელთაგან 21 ქულით ბომბარდირი კარლოს აროიო გახდა, ზორან ერცეგმა 19 გაადროვა, მანუჩარ მარკოიშვილმა კი 26 წუთში თავი 8 ქულას, 3 პასს, 2 მოხსნას და 1 ჩაჭრას მოუყარა. ეს ერთადერთი ჩაჭრა ქართველმა ლეგიონერმა საფინალო სირენამდე 1:41 წუთით ადრე მიითვალა, რის შემდეგაც სწრაფი გარღვევით 2-ქულიანი ჩააგდო და ანგარიში გაათანაბრა- 72:72. მანუჩარმა 2-დან 1 ორქულიანი და 4-დან 2 სამიანი ჩააგდო.
ასე და ამგვარად, მარკოიშვილის “გალათასარაი”ევროლიგას ჩამოსცილდა და ახლა ერთადერთ ასპარეზად თურქეთის ჩემპიონატი დარჩა. მეოთხედფინალური სერიის მე-3 მატჩს 0:2 ჩამორჩენილი გიორგი შერმადინის “ოლიმპიაკოსი” მადრიდის “რეალთან” ხვალ, 21 აპირლს გამართავს.
