წარუმატებელი დღე ჰქონდათ ვითიბი ლიგაში მოასპარეზე ქართველებს. გასულ ტურში ლევან ფაცაციას „ნიჟნი ნოვგოროდმაც“ წააგო და მანუჩრ მარკოიშვილის ცსკა-მაც. ორივე ქართველმა 5-5 ქულა ჩააგდო და მთლიანობაშიც დაახლოებით ერთნაირი სტატისტიკა აჩვენა.
საინტერესოა, რომ ცსკა-ს ვითიბი ლიგაში აქამდე გამართულ 17 შეხვედრაში მხოლოდ 1 წაგება ჰქონდა განცდილი. არმიელებმა კრასნოდარში, „ლოკომოტივ-ყუბანთან“ 73:81 წააგეს. მარკოიშვილის გუნდმა ამჯერად მოსკოვში უმასპინძლა ყუბანელებს და კვლავ მარცხი განიცადა – ამჯერად 2 ქულით, 76:78 წააგო.
მარკოიშვილი სათადარიგო იყო და მოედანზე 15:23 წუთით გამოჩნდა. ქართველმა უკანახაზელმა 4-დან 1 სამქულიანი და 2-დან 2 საჯარიმო ჩააგდო. 5 ქულას მანუჩარმა 2 მოხსნა და 1 ჩაჭრა მიაბა, ბურთი კი 2-ჯერ დაკარგა. საუკეთესო მილოშ თეოდოსიჩი გახდა 20 ქულითა და 10 პასით, თუმცა ამით მან არმიელებს ვერ უშველა.
16 მოგებითა და 2 მარცხით ცსკა ლიგაში პირველ ადგილს ინარჩუნებს. 14 მოგებითა და 3 წაგებით მე-3 ადგილზეა ფაცაციას გუნდი. „ნიჟნი ნოვგოროდმა“ მოულოდნელი მარცხი ტალინში „კალევთან“ იწვნია. რუსული კლუბი უშანსოდ – 76:110 განადგურდა.
ფაცაცია სათადარიგო იყო და მოედანზე 22:16 წუთი გაატარა. ლევანმა 2-დან 1 სამქულიანი და 2-დან 2 საჯარიმო ჩაგო. 5 ქულასთან ერთად ფაცაციამ 3 მოხსნა და 1 პასი მიითვალა, ბურთი კი 1-ჯერ დაკარგა. ნოვგოროდელთაგან 19 ქულით საუკეთესო ტრეი ტომპკინსი გახლდათ.
ითიბი ლიგაში მორგიგი შეხვედრა ფაცაციას გუნდს სარატოვში, „ავტოდორთან“, 8 თებერვალს ელის.
