დრამატული, უაღრესად დაძაბული და ემოციური შეხვედრა. პირველ მატჩში ესტონეთის დამარცხების შემდეგ საქართველოს ეროვნული გუნდი ტალინის ტურნირზე ამერიკის სტუდენტური ლიგის ნაკრებთან დრამატულ ბრძოლაში დამარცხდა. შეხვედრა 50 წუთს გაგრძელდა, ანუ დაინიშნა 2 დამატებითი 5-წუთეული, რომლის შემდეგაც გამარჯვებული ამერიკელები გამოვიდნენ – 129:124.
ასეთი დიდი ანგარიშით ეროვნული ნაკრების არც ერთი მატჩი არ დასრულებულა. შეხვედრა საკმაოდ შედეგიანი გამოდგა. ორივე გუნდმა აქცენტი შეტევაზე აიღო და საბოლოოდ ორივე მათგანი 120-ქულიან ზღვარს ასცდა.
საქართველოს ნაკრებში საუკეთესო შედეგი ვიქტორ სანიკიძეს ჰქონდა, რომელმაც პირველი მატჩის მსგავსად ორმაგი დუბლი შეასრულა – 30 ქულა და 15 მოხსნა. მატჩის ბომბარდირი კი მანუჩარ მარკოიშვილი გახდა, რომელმაც 14-დან 7 სამქულიანი ჩააგდო და საბოლოოდ 31 ქულა მიითვალა.
ორმაგი დუბლი ჰქონდა თორნიკე სენგელიასაც, რომელმაც 27 ქულასთან ერთად 13 მოხსნაც მიითვალა. სამმაგ დუბლამდე 1 პასი დააკლდა მეორე ნატურალიზებულ ამერიკელ გამათამაშებელ კორი ფიშერს – 12 ქულა, 10 მოხსნა და 9 პასი.
მატჩის შემდეგ ტალინში ჩვენი ნაკრების ერთ-ერთ მწვრთნელ დავით უსტიაშვილს შევეხმიანეთ, რომელმაც სემდეგი კომენტარი გააკეთა:
– პირველ ათწუთეულში მეტოქეს 12 ცდიდან 7 სამქულიანი ჰქონდა ჩაგდებული. საბოლოოდ ჩვენ უფრო მეტი შორი სროლა ჩავაგდეთ, თუმცა თავდაპირველად ამ კომპონენტში ამერიკელები გვჯობდნენ. სწრაფი თამაში იყო და ორივე გუნდს მეტი აქცენტი უფრო შეტევაზე ჰქონდა გადატანილი. ეს განზრახულად არ ხდებოდა. შეტევაში თამაში მიგვდიოდა და შესაბამისად ბურთის ჩაგდებაზე უფრო მეტად ვიყავით ორიენტირებულნი.
– დრამატული ფინალი იყო. საჯარიმოები რომ ჩაგვეგდო, გავიმარჯვებდით, მაგრამ სამწუხაროდ ესე არ მოხდა. ვათამასეთ მეორე ამერიკელი, რომელმაც კარგი გამთამაშებლის თვისებები გამოავლინა და 9 შედეგიანი გადაცემა დააგროვა და სამმაგ დუბლამდე 1 პასი დააკლდა.
– ხვალ ჩეხეთის ნაკრებს ვეთამასებით და მოგების შემთხვევაში ტურნირზე გამარჯვების რეალური სანსი გვაქვს
ტალინის საერთაშორისო ოთხთა ტურნირი. 30 ივლისი
საქართველო 124:129 აშშ-ს სტუდენტები
28:36, 19:22, 27:24, 29:21, 11:11, 10:15
სრული სტატისტიკა:
http://basket.ee/index.php?mid=6§ion=boxscore&gid=2013093004
30 ივლისი
ესტონეთი – ჩეხეთი 70:72
31 ივლისი
საქართველო – ჩეხეთი 18:00
ესტონეთი – აშს-ს სტუდენტები 20:00
