საქართველოს ეროვნული ნაკრების წევრი, ლევან ფაცაცია, რომელიც რუსული „ნიჟნი ნოვგოროდის“ ღირსებას იცავდა, თავისუფალი აგენტია. ორმხრივი სურვილისა და შეთანხმების საფუძველზე ქართველმა ფორვარდმა რუსული კლუბი დატოვა.
ფაცაციამ რუსეთის ერთ-ერთ საუკეთესო გუნდში 3 თვე გაატარა. ის ნოემბრის თვეში ჩაირიცხა „ნიჟნი ნოვგოროდში“ და თავდაპირველად გუნდში გამოსაცდელი დროით იყო. 1 თვის გასვლის შემდეგ ფაცაციას კონტრაქტი სეზონის ბოლომდე გაუფორმეს და ის ცოტას, თუმცა სისტემატიურად თამაშობდა ევროლიგასა და ვითიბი ლიგაში. დღეს კი კლუბის ვებ-გვერდზე სტატია გაჩნდა, სადაც ფაცაციას მადლობას უხდიდნენ და მასთან კონტრაქტის გაწყვეტას იუწყებოდნენ.
კომენტარი გააკეთა „ნიჟნი ნოვგოროდის“ ლატვიელმა მთავარმა მწვრთნელმა აინარს ბაგაცკისმა;
„ერთობლივი სამუშაოსთვის ლევანს მადლობა. ის გუნდს დიდ დახმარებას უწევდა. სათადარიგოთა სკამიდან მას მოედანზე საჭირო ენერგია შემოჰქონდა. ის კარგად ირჯებოდა დაცვაში. სეზონის ბოლოს შეტევაში მეტი არსენალის მქონე მოთამაშე გვჭირდება“.
