სანაძის 15 ქულა “ოლიმპიას” დასამარცხებლად საკმარისი არ აღმოჩნდა

დუდა სანაძის „პრიმორსკა სლოვენიის ჩმპიონატის მორიგ ტურში ამ ქვეყნის ყველაზე ტიტულოვან გუნდთან – ლიუბლიანის „ოლიმპიასთან“ დამარცხდა. ზღვისპირელებმა ოლიმპიელებს კოპერში უმასპინძლეს და დაძაბულ ბრძოლაში – 81:87 წააგეს.

სანაძე სასტარტო ხუთეულში არ ყოფილა და მოედანზე მთლიანობაში 28:42 წუთი გაატარა. ქართველი ლეგიონერის ანგარიშზე 15 ქულა, 3 მოხსნა, 3 პასი და 2 ჩაჭრა დაგროვდა. დუდამ 5-დან 2 ორქულიანი, 5-დან 2 სამქულიანი და 7-დან 5 საჯარიმო ჩააგდო, ბურთი 5-ჯერ დაკარგა, მის წინააღმდეგ 4-ჯერ დაჯარიმდნენ, თავად კი მოედანი 5 პერსონალური ფოლის მიღების მერე დატოვა. “პრიმორსკას” 11 მოგება და 10 მარცხი მოუგროვდა და სატურნირო ცხრილში მე-6 ადგილზე იმყოფება, მომდევნო მატჩს კი 15 მარტს, სტუმრად, “პოდჩეტრტეკთან” ჩაატარებს.