ვიქტორ სანიკიძემ ორმაგი დუბლის გემო გაიხსენა და ეს ნახევარფინალურ სერიაში მოახერხა. სამწუხაროდ, ქართველი ფორვარდს თანაგუნდელებმა სათანადოდ ვერ აუბეს მხარი და „სიენამ“ სერიის მე-5 მატჩი 67:71 წააგო.
შესაბამისად, „სიენას“ ფინალში გასვლა გადაიდო. სანიკიძის გუნდი სერიას 3:1 იგებდა და წარმატების მისაღწევად 1 მოგება აკლდა, თუმცა „ვარეზემ“, რომელმაც რეგულარული ჩემპიონატი მოიგო, მოახერხა გამარჯვება და სერიაში ჩამორჩენა მინიმუმამდე შეამცირა. წინ მე-6 მატჩია, რომელსაც „სიენა“ მასპინძოლს და რომელშიც სანიკიძის გუნდი გამარჯვების მოპოვებას და ფინალში გასვლას შეეცდება.
სანიკიძე სასტარტო ხუთეულში არ ყოფილა, მოედანზე კი 22 წუთით გამოჩნდა და სიენელთაგან ერთ-ერთი საუკეთესო იყო. ქართველმა ფორვარდმა 10 ქულა, 11 მოხსნა და 3 ჩაჭრა მოაგროვა, ბურთიც სამჯერ დაკარგა. ვიქტორმა 3-დან 3 ორქულიანი, 3-დან 1 სამიანი და 3-დან 1 საჯარიმო ჩააგდო. სანიკიძეზე შედეგიანი სიენელთაგან მხოლოდ ბობი ბრაუნი გახლდათ, რომელმაც 32 წუთში 25 ქულა დააგროვა.
სერიის მე-6 შეხვედრა სიენაში 5 ივნისს გაიმართება. თუ სიენელები მოიგებენ, ფინალში გავლენ, არადა, სერიის მე-7, გადამწყვეტ შეხვედრას „ვარეზე“ 7 ივნისს უმასპინძლებს.
