საქართველომ ევრობასკეტი მოქმედი ჩემპიონი ესპანეთის დამარცხებით გახსნა

საქართველოს ეროვნულმა ნაკრებმა ევრობასკეტი მოქმედი ჩემპიონის – ესპანეთის დამარცხებით დაიწყო. დამარცხებაცაა და დამარცხებაც – მსოფლიოს ერთ-ერთ საუკეთესო ნაკრებს ისე ვძლიეთ, ბოლო პერიოდში ვითარება არ დაძაბულა. საბოლოო ჯამში, რასაც ანგარიშმაც გაუმაგრა ზურგი, საქართველომ ესპანეთი დამაჯერებლად დაამარცხა: ისე, რომ ევრობასკეტის მოქმედ ჩემპიონებს შანსიც არ ჰქონიათ. 

ასეთი რამ კი იშვიათად ხდება. საქართველო ევრობასკეტზე პირველად 2011 წელს გავიდა და მას შემდეგ უწყვეტლივ, უკვე მე-6 ტურნირს თამაშობს. კონტინენტის პირველობაზე გამართული თამაშებიდან ერთი ხელის თითებზე არ ჩამოითვლება მატჩები, საქართველომ ბოლო წუთების ნერვიულობის გარეშე რომ მოიგო. დღეს სწორედ ასეთი გამონაკლისის ჯერი გახლდათ და ეს არა ბელგიასთან, უკრაინასთან, ანაც პოლონეთთან, რომლებიც სხვადასხვა ევრობასკეტებზე შესაბამისად 22, 16 და 17 ქულით გვყავს დამარცხებული, არამედ ეპანეთთან, ამ საუკუნეში ყველაზე ტიტულოვან ევროპულ ნაკრებთან მოვახერხეთ.

საქართველომ კარგად დაიწყო და უკეთესად დაამთავრა. ალეკსანდარ ჯიკიჩის გუნდმა გაუძლო ესპანელების წნეხს პირველი ნახევრის მიწურულს, როცა 10-ქულიანი ლიდერობის შემდეგ პირველად ჩამორჩა. თითქოს ყველაფერი ლოგიკურ კალაპოტში ჩაჯდა – გრანდმა კერკეტ მოწინააღმდეგეს გასაღები მოარგო და ლიდერობა მოიპოვა, თუმცა საქართველომ მძლავრად ჩაამთავრა მეორე პერიოდი, ლიდერობა დაიბრუნა და მესამე, საკვანძო პერიოდში მეტოქე, რბილად რომ ვთქვათ, დაჩაგრა.

ეს იყო კლასიკურად მოგებული მატჩი, როცა ყველაფერი ისე მიგყავს, რომ მეტოქემ ვერაფერი ქნას. ასეთი თამაშის შედეგი უპირობო გამარჯვებაა და ეს საქართველოს ნაკრებმა შეძლო სწორი ტაქტიკითა და გამართული თამაშით. და ეს ყველაფერი იმ უდიდესი წნეხისა და ტვირთის შემდეგ, რაც ჩვენმა ნაკრებმა მოსამზადებელ ციკლში წაგებული 6 მატჩისა და წარუმატებელ თამაშებს მოყოლილი კრიტიკის შემდეგ გამოიარა. რა თქმა უნდა, მოგება კარგია, მაგრამ გამარჯვებას მაშინ აქვს ფასი, როცა შეხვედრა ოფიციალურია.

საქართველოს ნაკრებმა არც ერთი ამხანაგური შეხვედრა არ ჩაატარა სრული შემადგენლობით. თან ყოველ მატჩში გუნდის ლიდერებიდან რომელიმე, ის მოთამაშეები აკლდა, რომლებმაც ესპანეთთან დღევანდელი გამარჯვება გამოჭედეს. 27 ივლისს შეკრებილმა საქართველოს ნაკრებმა პირველი სრულყოფილი ვარჯიში, რომელშიც სრული შემადგენლობა მონაწილეობდა, ესპანეთთან მატჩამდე ერთი დღით ადრე, გუშინ ჩაატარა. სწორედ ამ ვარჯიშის შემდეგ შეუშუპდა ფეხი სანდრო მამუკელაშვილს და მისი თამაში ესპანეთთან სათუო იყო:

“მამუკელაშილის თამაში დღეს 50/50-ზე იყო – თქვა მატჩის შემდეგ პრესკონფერენციაზე ალეკსანდარ ჯიკიჩმა – მას ფეხი აწუხებდა, მაგრამ შეძლო მოედანზე გასვლა და გამარჯვებაში თავისი წილის შეტანა. რაც შეეხება თორნიკე შენგელიას, გუნდის 2 წევრს დავალებული ჰქონდა მისი სკამზე ძალით დკავება”.

ვინც არ იცის, განვმარტავთ, რო შენგელია ნაკრებს კვიპროსში ეპანეთიდან შემოუერთდა, სადაც 2 კვირა, გამოკვლევებზე იმყოფებოდა. გულის არითმიის გამო მას “ბარსლონამ” ძირეული გამოკვლევა ჩაუტარა და რეკომენდაცია მისცა, ევრობასკეტის მინიმუმ საწყის მატჩში დაესვენა. შენგელიამ ესპანეთთან მატჩი სასტარტო ხუთეულში დაიწყო და პირველ პერიოდში 3 წუთი ითამაშა. როცა მატჩის მიმდინარეობამ აჩვენა, რომ ჩვენს ნაკრებს მოგების  რეალური შანსი ჰქონდა და მისი მიღწევა მხოლოდ ერთიანი ძალისხმევით შეიძლებოდა, შენგელიამ ბოლომდე თამაში გადაწყვიტა. მართალია, ის მისთვის საშუალოზე ბერვად მცირე ხნით, 20 წუთით იყო მოედანზე, მაგრამ გამარჯვებაში საკუთარი, როგორც ყოველთვის, მოზრდილი წილი დაიდო. ჯიკიჩის კომენტარიც სწორედ შენგელიას მდგომარეობას უკავშირდებოდა, რომელსაც სამედიცინო პროტოკოლის მიხედვით ესპანეთთან არ, ან მცირე დროით უნდა ეთამაშა.

ცალკე სათქმელია გოგა ბითაძეზე, რომელმაც ესპანელებს უდიდესი პრობლემები შეუქმნა ფარქვეშ, მაგრამ სასიკვდილო ლახვარი პერიმეტრიდან – კუთხეებიდან ჩაგდებული სამქულიანებით ჩასცა. ეს მოხდა ბოლო პერიოდში, როცა საქართველოს ნაკრებმა მასტერკლასი ჩაუტარა ევროპის მოქმედ ჩემპიონებს და იმ იდეალური დაცვის შედეგი, რომელიც I-II-III პერიოდებში ითამაშა, ბოლო ათწუთეულში მოიმკა. საქართველომ შეტევაში თამაში გაშალა – პერიმეტრიდან მამუკელაშვილი შურდულივით უტევდა და სამიანებსაც ყრიდა, ბექა ბურჯანაძემ 2 უმნიშვნელოვანესი ბურთი ჩააგდო და 2 ამდენი მოხსნა. გიორგი შერმადინმა შეტევაში მოხსნები და საკვანძო ორქულიანები მიითვალა, დუდა სანაძემ კი თავისი შედეგიანობა მთელ მატჩზე გადაანაწილა. 

კამარ ბოლდუინი მოსამზადებელ მატჩებში თითქოს ჩრდილში იყო – ისევე როგორც ჩვენი ნაკრების ყველა კალათბურთელი, რომლებმაც ესპანეთთან ისე წარმოაჩინეს საქართველოს ნაკრები, როგორც ევრობასკეტის მთავარი ფავორიტი. ბოლდუინმა უდიდესი სამუშაო გასწია, რომელიც ქულებს ხომ იხვეჭდა და ბურთსაც საიმედოდ ათამაშებდა. მას პირველი ნომრის პოზიციაზე ღირსეულად ცვლიდა რატი ანდრონიკაშვილი, რომლის გრძელმა ხელებმა ესპანელების არაერთი შეტევა ჩაშალა, ხოლო ქართველებისა – დააგვირგვინა. 

საქართველოს ნაკრებმა ევრობასკეტის მოქმედი ჩემპიონი საბოლოოდ 14 ქულით – 83:69 (სტატისტიკა) დაამარცხა და მოედანზე გასული 10 მოთამაშიდან ხუთმა 10-ქულიან ზღვარს გადააბიჯა. საუკეთესო მაჩვენებელი ჰქონდა სანდრო მამუკელაშვილს – 19 ქულა, 7 მოხსნა, 6 პასი. გოგა ბითაძემ 15 ქულა და 5 მოხსნა მიითვალა. შენგელიამ 20 წუთში 13 ქულა მოაგროვა, კამარ ბოლდუინის ანგარიშზე 12, დუდა სანაძისაზე კი 11 ქულა დაგროვდა. 

ჩვენს ჯგუფში გამართულ მომდევნო მატჩში ბოსნიამ 91:64 გაანადგურა მასპინძელი კვიპროსი, როლო საბერძნეთმა იტალიას სძლია. 29 აგვისტოს ლიმასოლის ჯგუფი ისვენებს, ხოლო 30-ში საქართველო იტალიას დაუპირისპირდება.