საქართველოს ეროვნული ნაკრების მეტოქე ალბანეთს ანტონის კოსტანტინიდისი გაწვრთნის

ევროპის ჩემპიონატის შესარჩევ ტურნირში საქართველოს ეროვნული ნაკრების მეტოქე ალბანეთს ახალი მთავარი მწვრთნელი ჰყავს. ალბანელებს კვიპროსელი სპეციალისტი ანტონის კოსტანტინიდისი გაწვრთნის.

41 წლის კვიპროსელი მწვრთნელი ამჟამად კოსოვოს გუნდ „პრიშტინა სიგალს“ წვრთნის. ყოფილ კალათბურთელ კოსტანტინიდისს სამწვრთნელო კარიერის უმეტესობა კვიპროსში აქვს გატარებული. პირველი უცხოური კლუბი, რომელსაც ის წვრთნიდა, რუმინული „ენერგია როვინარი“ გახლდათ, რომელიც გასულ სეზონში ფიბა ევროჩელენჯის ოთხთა ფინალში გაიყვანა.
ალბანეთთან ერთად საქართველოს ნაკრების მეტოქეები ევროპის 2016 წლის ჩემპიონატის შესარჩევ ტურნირზე მონტენეგრო და სლოვაკეთი იქნებიან. საქართველო ევროსაკვალიფიკაციოს სწორედ ალბანეთთან მატჩით, 31 აგვისტოს გახსნის. საპასუხო მატჩი ტირანაში 10 სექტემბერს გაიმართება.