შენგელია ევროლიგის მეორე ეტაპზე ფაცაცაიასა და მარკოიშვილთან ერთად

თორნიკე შენგელიას „კუჩა ლაბორალი“ ევროლიგის ჯგუფური ეტაპის ბოლო ტურში დამარცხდა, თუმცა მომდევნო ეტაპზე მაინც გავიდა. ვიტორიელებმა საჭირო გამარჯვებები 2 განვლილ ტურში მოიპოვეს და დღევანდელ მატჩში წაგებით ბევრი არაფერი დაუკარგავთ.
შენგელიას გუნდი ბელგრადში „ცრვენა ზვეზდას“ შეხვდა და 82:90 წააგო. ქართველი ფორვარდი სასტარტო ხუთეულში იმყოფებოდა, მოედანზე კი 12:47 წუთი გაატარა, რა დროშიც 2 ქულა, 5 მოხსნა და 1 დაფარება მიითვალა. თორნიკემ 3-დან 1 ორქულიანი ჩააგდო, სხვა ღირებულების სროლა კი არ განუხორციელებია.
5 მოგებითა და 5 წაგებით „ლაბორალმა“ D ჯგუფში ასპარეზობა მე-3 ადგილზე დაასრულა და 30 დეკემბრიდან 8-გუნდიან მეორე ჯგუფურ ეტაპზე ლევან ფაცაციას „ნიჟნი ნოვგოროდთან“ და მანუჩარ მარკოიშვილის ცსკა-სთან ერთად იასპარეზებს.