საქართველოს ეროვნული ნაკრების ფორვარდის, თორნიკე შენგელიას „ბასკონია“ ესპანეთის ჩემპიონატში სტაბილურად ვერ ასპარეზობს. ვიტორიელები წინა ტურში შინ „სარაგოსასთან“ მარცხს გადაურჩნენ, თუმცა გასულ ტურში აღარ გაუმართლათ. ბასკურმა გუნდმა ტენერიფეს „იბეროსტარს“ უმასპინძლა და 1 ქულით – 72:73 წააგო.
ტრავმის მოშუშების შემდეგ ქართველი კალათბურთელი სასტარტო ხუთეულში პირველად გამოჩნდა, თუმცა, თამაში არ წაუვიდა. თორნიკემ მოედანზე მხოლოდ 13:42 წუთი დაჰყო და 2 ქულა და 6 მოხსნა მიითვალა. შენგელიამ 3 ორქულიანი ააცილა, 2 საჯარიმო ჩააგდო, ბურთი 3-ჯერ დაკარგა და მის წინააღმდეგ 3-ჯერ დაჯარიმდნენ.
“ბასკონიას” რიგებში საუკეთესო ამერიკელი შეინ ლარკინი იყო 23 ქულით, სტუმართა მხრიდან კი ასევე ამერიკელი დევინ უაიტი გამოირჩა – 17 ქულა. 6 მოგებითა და 4 მარცხით „ბასკონია“ მე-7 ადგილამდე დაქვეითდა, მომდევნო მატჩს კი 4 დეკემბერს, სტუმრად, “ბეტისთან” გამართავს.
