თორნიკე შენგელიამ „ბასკონიაში“ ისევ გაიბრწყინა და თავის გუნდს ევროლიგის მორიგი მატჩი მოაგებინა. ქართველი ფორვარდი ყაზანში, „უნიკსთან“ გამართული მატჩის მთავარი მოქმედი პერსონა იყო და ბასკურმა გუნდმა რომ 92:91 იმარჯვა, უპირველესად მისი დამსახურებაა. დაძაბული მატჩის ბოლო 3 წუთში თორნიკემ 8-დან 8 საჯარიმო ჩააგდო.
ქართველი ფორვარდი სასტარტო ხუთეულში არ ყოფილა, თუმცა, მატჩის მიმდინარეობისას თავი გამოიჩინა და მე-2 ტაიმი ძირითად შემადგენლობაში დაიწყო. თორნიკემ მწვრთნელს ნდობა დაუფასა და გადამწყვეტ წუთებში შეუდარებელი იყო. მატჩის დასრულებამდე 02:54 წუთით ადრე, როდესაც “ბასკონია” 80:84 აგებდ, ქართველ ლეგიონერზე პაველ ანტიპოვი დაჯარიმდა და შენგელიამაც ორივე ტყორცნა გამოიყენა. თორნიკემ იქვე ჩაჭრა მიითვალა და კვლავ ანტიპოვის ფოლის მერე, კიდევ 2 ჯარიმა ჩააგდო – 84:84. ყაზანელთა ლიდერმა კიტ ლენგფორდმა მასპინძლები ზუსტი ორქულიანით ისევ წინ გაიყვანა, თუმცა, შენგელიამ წესების დარღვევა უკვე ბერძენ კოსტას კაიმაკოღლუს აიძულა და საჯარიმოს ხაზიდან კვლავ ზუსტი იყო – 86:86. მომდევნო შეტევაში 2 საჯარიმო ლენგფორდმა ჩააგდო, რასაც ილიმანე დიოპმა მხოლოდ 1 ზუსტი ტყორცნით უპასუხა, კინო კოლომმა შორეული სროლა ააცილა, შეინ ლარკინი კი შორი მანძილიდან შეტევას არ მოერიდა და საფინალო სირენამდე 6 წამით ადრე, ბასკური კლუბი 90:88 დაწინაურდა. თითქოს სტუმრები გამარჯვებასთან ახლოს იყვნენ, თუმცა, 4.9 წამით ადრე, ლენგფორდი მეტოქეებს დიდებულად დაუსხლტა და სამქულიანით “უნიკსი” ისევ წინ გაიყვანა – 91:90. შენგელიამ თავისი სიტყვა სწორედ გადამწყვეტ წამებში თქვა. “ბასკონიას” ბოლო იერიშის დროს ფარქვეშ შესვლა სცადა, რასაც მის მიერ გაწამებული ანტიპოვის მორიგი ფოლი და თოკოს კიდევ 2 ზუსტი საჯარიმო მოჰყვა – 92:91. დარჩენილ 1.8 წამში ლენგფორდმა შორეული ტყორცნა კი მოასწრო, მაგრამ ამჯერად – არაზუსტად. საერთო ჯამში, ქართველმა ლეგიონერმა მოედანზე 24:05 წუთში დაჰყო და 19 ქულა, 3 მოხსნა, 2 ჩაჭრა და 1 დაფარება მოაგროვა. თოკომ 6-დან 3 ორქულიანი, 2-დან 1 სამქულიანი და რაც ყველაზე საინტერესოა, 11-დან 10 საჯარიმო ჩააგდო. ქართველმა ფორვარდმა ბურთი 3-ჯერ დაკარგა, 2 პერსონალური ფოლი მიიღო, მის წინააღმდეგ კი ერთბაშად 9-ჯერ დაჯარიმდნენ. შედეგად, შენგელიას სარგებლიანობის კოეფიციენტი 24-ს გაუტოლდა, რითაც ის თანაგუნდელთაგან მხოლოდ ლარკინს (26) ჩამორჩა. ამერიკელმა გამთამაშებელმა 28:53 წუთში 22 ქულა, 6 პასი, 2 ჩაჭრა და 1 მოხსნა მოაგროვა. მასპინძელთა მხრიდან საუკეთესონი უკანახაზელები იყვნენ. ლენგფორდმა 34:46 წუთში 28 ქულა და 5 პასი მიითვალა, ხოლო კოლომმა 29:54 წუთში 8-დან 5 სამქულიანი გამოიყენა და 23 ქულას 6 შედეგიანი პასი წაამატა. “ბასკონიამ” ევროლიგის მე-12 ტურში მე-8 გამარჯვება იზეიმა და სხვა მატჩების დასრულებამდე, მადრიდის “რეალთან” და სტამბულის “ფენერბაჰჩესთან” ერთად, მეორე-მეოთხე ადგილებს იყოფს. შენგელიას კლუბი მომდევნო მატჩს 21 დეკემბერს, შინ, ესპანურსავე “ბარსელონასთან” ჩაატარებს.
