დრამატული მატჩი მოიგო თორნიკე შენგელიას გუნდმა ევროლიგაში. „ლაბორალმა“ ვიტორიაში სტამბოლის „გალათასარაის“ უმასპინძლა და 1 ქულის სხვაობით – 91:90 დაამარცხა.
მატჩის დასრულებამდე 4 წუთით ადრე თურქული კლუბი 84:78 იგებდა, თუმცა მასპინძლებმა ბოლომდე იბრძოლეს და 10:0 გაქცევის შემდეგ 88:84 დაწინაურდნენ. სტამბოლელებმა მაინც მოახერხეს დაწინაურება – კარლოს აროიომ ჯერ სამიანი ჩააგდო, ხოლო ბოლო წუთზე საჯარიმოთი „გალათასარაი“ 90:89 გაალიდერა.
გადამწყვეტი სიტყვა ამერიკელმა კოლტონ აივერსონმა თქვა, რომელმაც დასრულებამდე რამენიმე წამით ადრე ორქულიანი ჩააგდო და ვიტორიელები 91:90 დააწინაურა. სტამბოლელებმა განწირული სამქულიანი ააცილეს და ბასკურმა გუნდმა ევროლიგაში მეორე გამარჯვება იზეიმა.
თორნიკე შენგელია სასტარტო ხუთეულში იყო და მოედანზე მთლიანობაში 18 წუთი გაატარა. ქართველმა ფორვარდმა 5-დან 2 ორქულიანი და 3-დან 2 საჯარიმო ჩააგდო, 3 სამიანი კი ააცილა. შენგელიამ 6 ქულა, 4 მოხსნა, 2 პასი და 1 დაფარება მიითვალა, ბურთი კი 2-ჯერ დაკარგა. გამარჯვებულთაგან საუკეთესო ტომას უერტელი იყო 17 ქულით და 8 პასით, კოლტონ აივერსონმა კი 14 ქულა და 6 მოხსნა დააგროვა.
ცხრილს ქვემოთ ნახავთ, მომდევნო მატჩს კი ვიტორიელები 7 ნოემბერს, სტუმრად „ვალენსიასთან“ გამართავენ.
D ჯგუფი
მ
წ
ჩაგდებული
მიღებული
+/-
ოლიმპიაკოსი
3
0
219
206
13
ცედევიტა
2
1
233
214
19
ლაბორალ კუტჩა
2
1
236
222
14
გალათასარაი
1
2
229
231
-2
ნეპტუნასი
1
2
233
254
-21
ვალენსია
0
3
195
218
-23
