შენგელიას 8 ქულა და ვიტორიელების მარცხი

თორნიკე შენგელიას გუნდმა ესპანეთის ჩემპიონატის 32-ე ტურის მატჩი სტუმრად, „ესტუდიანტესთან“ წააგო. რეგულარული ჩემპიონატის დასრულებამდე 2 ტურით ადრე „ლაბორალ კუჩა“ მე-7 ადგილზე იმყოფება, თუმცა მდევრებსაც ქულების ანალოგიური ოდენობა აქვთ და თუ დარჩენილ 2 შეხვედრაში ვერ იმარჯვა, შესაძლოა პლეი ოფის მიღმა დარჩეს.
სტუმრად 76:86 წაგებულ შეხვედრაში შენგელიამ 25 წუთი ითამაშა და 8 ქულა დააგროვა. ქართველმა ფორვარდმა 7-დან 1 ორქულიანი და 8-დან 6 საჯარიმო ჩააგდო, 2 სამიანი კი ააცილა. სხვა სტატისტიკური მაჩვენებელი შენგელიას არ ჰქონია. მომდევნო ტურის მატჩს „ლაბორალ კუჩა“ 20 მაისს, შინ მადრიდის „რეალთან“ გამართავს.