შენგელიას ორმაგი დუბლი ბასკონიას ბურგოსის დასამარცხებლად არ ეყო

თორნიკე შენგელიას ბასკონიამ მთავარი მწვრთნელი, ველიმირ პერასოვიჩი გაუშვა, თუმცა საქმე ჯერ არ გამოსწორებულა და გუნდმა ისევ წააგო. ბასკონიელებმა სან პაბლოს ბურგოსს უმასპინძლეს და საკუთარი გულშემატკივრების თვალწინ 74:82 დამარცხდნენ.

საქართველოს ნაკრებისა და ბასკონიის კაპიტანმა, თორნიკე შენგელიამ ორმაგი დუბლი გაიფორმა, თუმცა მას თანაგუნდელებმა სათანადოდ მხარი ვერ აუბეს და ბოლო პერიოდის 18:28 წაგების შემდეგ ბასკონიელებმა მარცხი განიცადეს. შენგელია ტრადიციულად სასტარტო ხუთეულში გამოჩნდა და 32:02 წუთში 13 ქულა, 10 მოხსნა (2 შეტევაში), 3 პასი, 2 ჩაჭრა და 1 დაფარება მოაგროვა.

ქართველმა მძიმე ფორვარდმა 11-დან 5 ორქულიანი და 6-დან 3 საჯარიმო ჩააგდო, 3 სამქულიანი ააცილა, ბურთი 2-ჯერ დაკარგა, 2-ჯერ დაუფარეს, 3 პერსონალური ფოლი მიიღო, მის წინააღმდეგ კი 4-ჯერ დაჯარიმდნენ.

ორივე გუნდის შემადგენლობაში ითამაშეს იმ კალათბურთელებმა, რომლებიც გასულ მსოფლიო ჩემპიონატის საკვალიფიკაციოზე საქართველოს ნაკრებს ეხმარებოდნენ და ახლაც მოქმედი ქართული პასპორტი აქვთ: ბასკონიაში მეტ ჯენინგმა, ხოლო ბურგოსში თად მაკფადენმა, რომელიც გახდა კიდეც მატჩის გმირი. ჯენინგმა 2 სამქულიანი მიითვალა, მაკფადენმა კი 19 ქულა და 6 პასი მიითვალა და ბურგოსელთა გამარჯვებაში ლომის წილი დაიდო.

ბასკონიას 14 ტურში 7-7 მოგება-წაგება მოუგროვდა და სატურნირო ცხრილში მე-7 ადგილზე იმყოფება, მომდევნო მატჩს კი 28 დეკემბერს, სტუმრად, მოულოდნელად მე-3 პოზიციამდე აღზევებულ სარაგოსასთან ჩაატარებს.