გიორგი შერმადინის წინამძღოლობით „ანდორა მორაბანკმა“ ესპანეთის უმაღლეს ლიგაში გასვლითი მატჩი მოიგო. ანდორელები „ესტუდიანტესს“ ესტუმრნენ და ქართველი ცენტრის ქებული თამაშის წყალობით 82:75 იმარჯვეს.
შერმადინი სასტარტო ხუთეულში გახლდათ და მოედანზე მთლიანობაში 22:31 წუთი გაატარა, რაც სრულიად საკმარისი გამოდგა საიმისოდ, რომ მატჩის საუკეთესო შედეგი დაეფიქსირებინა. გიორგიმ 7-დან 3 ორქულიანი და 6-დან ექვსივე საჯარიმო ჩააგდო. შესაბამისად, ქართველ ცენტრს 12 ქულა დაუგროვდა, რასაც მან 14 მოხსნა და 1 პასი მოაყოლა.
შერმადინის საერთო სარგებლიონობის ინდექსმა 23 ერთეული შეადგინა და ის ამ შედეგით მატჩში საუკეთესო იყო. ანდორელთაგან 15 ქულით ბეტინო გომესი გამოირჩა, ხოლო დევიდ ნავაროს ანგარიშზე 13 ქულა დაგროვდა.
5 მოგებითა და ამდენივე წაგებით „ანდორა მორაბანკი“ ესპანეთის ჩემპიონატში მე-9 ადგილზეა. მომდევნო, მე-11 ტურში, 20 დეკემბერს შერმადინის გუნდი მადრიდის „რეალს“ უმასპინძლებს.
