გიორგი შერმადინი გასულ კვირაში ესპანეთის უმაღლესი ლიგის საუკეთესო მოთამაშის პრიზის მოგების კანდიდატად დაასახელეს და სოციალურ ქსელებში მიმდინარე გამოკითხვაში შეიყვანეს. ცუდად დაემთხვა, რომ სწორედ ახლა ითამაშა ქართველმა ცენტრმა სეზონის ერთ-ერთი უხეირო მატჩი. მისმა „ანდორამ“ მალაგაში „უნიკახასთან“ 71:82 წააგო, შერმადინმა კი მოედანი უქულოდ დატოვა.
საქართველოს ეროვნული ნაკრების წევრი ანდორელთა სასტარტო ხუთეულში გახლდათ. შერმადინმა მეტოქის ფარს 4-ჯერ შეუტია, თუმცა ყველა აუცდა. გიორგიმ საბოლოოდ 5 მოხსნა და 1 პასი მიითვალა. ანდორელთაგან 14 ქულით საუკეთესო უკა ბოგდანოვიჩი გახლდათ, გამარჯვებულთა ლიდერებმაც – ნემანია ნედოვიჩმა და მინდაუგას კუზმინსკასმაც 14-14 ქულა მიითვალეს.
11 მოგებითა და 17 წაგებით ანდორელები „სევილიასთან“ ერთად 12-13 ადგილებს იყოფენ და მათთვის პლეი ოფში გასვლა უკვე ძალიან ბუნდოვანია. მომდევნო მატჩს შერმადინის გუნდი 24 აპრილს, სტუმრად „გრან კანარიასთან“ გამართავს.
