ტრავმირებული შენგელია “ბრუკლინმა” კვლავ შემადგენლობაში დააბრუნა

თორნიკე შენგელიას ტვინის შერყევის სიმპტომები აქვს და ჯერ უცნობია, როდის დაუბრუნდება მოედანს – ესეთი ინფორმაცია გაავრცელა „ბრუკლინ ნეთსმა“, რომელმაც ქართველი ფორვარდი ნბა-ს განვითარების ლიგიდან გუნდში დააბრუნა.
შენგელიასთან ერთად ბრუკლინელებმა დაიბრუნეს ტაიშონ ტეილორი. ეს 2 კალათბურთელი D-ლიგაში „ნეთსის“ სატელიტ გუნდ „სპრინგფილდ არმორში“ იყო განათხოვრებული. შენგელიამ ბოლო 3 დღეში 2 მატჩი ითამაშა: პირველში 39 ქულა და 18 მოხსნა დააგროვა, ხოლო მეორეში – 24 ქულა და 13 მოხსნა. მესამე მატჩში შენგელიას არ უთამაშია. როგორც ბრუკლინელთა ექიმები ამბობენ, ქართველ ფორვარდს ტვინის შერყევის ნიშნები აქვს.