ცინცაძის 12 ქულა და გამარჯვება საფრანგეთის ჩემპიონატის სადებიუტო მატჩში

გიორგი ცინცაძის შედეგიანი დებიუტი საფრანგეთის უმაღლეს დივიზიონში. ქართველი გამთამაშებლის გუნდი გრავლინმა პირველი ტურის მატჩში რუანს უმასპინძლა და საკმაოდ იოლად – 89:67 დაამარცხა, რაშიც ცინცაძეს არცთუ მოკრძალებული წვლილი მიუძღვის.
საქართველოს ნაკრების გამთამაშებელი გრავლინელთა სასტარტო ხუთეულში არ ყოფილა. ის სათადარიგოთა სკამიდან ჩაერთო თამაშში და მოედანზე გატარებულ 16 წუთში 12 ქულა, 2 მოხსნა, 2 პასი და 1 ჩაჭრა მიითვალა, ბურთი კი 2-ჯერ დაკარგა.
ცინცაძე საკმაოდ მაღლი პროცენტულობით ესროდა: 4-დან 3 ორქულიანი და 3-დან 2 სამიანი ჩააგდო. გამარჯვებულთაგან 19-19 ქულით ენდრიუ ალბისი და სტივ გრეი გამოირჩნენ, მარკუს დავის ანგარიშზე კი 18 დაგროვდა.
საფრანგეთის ჩემპიონატის მეორე ტურში, 6 ოქტომბერს გრავლინი სტუმრად ნანსის გაეჯიბრება.