ცინცაძის “რუანმა” სტუმრად “შოლე” დაამარცხა

როგორც იქნა, გამარჯვება მოიპოვა გიორგი ცინცაძის გუნდმა, თანაც – სტუმრად. საფრანგეთის უმაღლესი ლიგის მორიგ, 31-ე ტურში „რუანი“ სტუმრად შეხვდა ცხრილით მასზე 2 საფეხურით მაღლა მყოფ „შოლეს“ და დაძაბულ ბრძოლაში – 90:87 მოუგო.
ქართველმა უკანახაზელმა 20 წუთი ითამაშა. ცინცაძემ ორჯერ შეუტია მეტოქის ფარს, რომელთაგან ორქულიანი ჩააგდო, სამიანი კი ააცილა. ცინცაძემ 2 ქულასთან ერთად 2 პასი, 1 მოხსნა და 1 ჩაჭრა დააგროვა. საუკეთესო კი გერშონ იაბუსელე გახლდათ 27 ქულითა და 11 მოხსნით.
რუანელებს 6 მოგების წილ 25 მარცხი აქვთ, ბოლოსწინა ადგილზე იმყოფებიან და მათ წინ მყოფ „ნანსის“ 3 ქულით ჩამორჩებიან, რისი აღმოფხვრაც დარჩენილ 3 ტურში თითქმის შეუძლებელია. მომდევნო ტურში, 26 აპრილს, ცინცაძის გუნდი სტუმრად “ნანტერს” შეხვდება.