ნიკა ცქიტიშვილის ჩინებული გარჯის მიუხედავად თეირანის „მაჰრამმა“ მარცხი განიცადა. დასავლეთ აზიის საკალათბურთო ლიგის ფინალური სერიის პირველ მატჩში ნიკოლოზ ცქიტიშვილის “მაჰრამი” ლიბანში ბეირუთის “ალ რიადის” ესტუმრა და 87:91 წააგო, ქართველმა კალათბურთელმა 38 წუთს ითამაშა და სტუმართა რიგებში საუკეთესო შედეგი დააფიქსირა.
ცქიტიშვილი ტრადიციულად თეირანელთა სასტარტო ხუთეულში იყო და მოედანზე გატარებულ 38 წუთში 14-დან 8 ორქულიანი, 2-დან 1 სამქულიანი და ორივე საჯარიმო ჩააგდო. ქართველმა ფორვარდმა 21 ქულას 7 მოხსნა, 3 პასი და 3 დაფარებაც წაამატა.
ცქიტიშვილს მაჰრამელთა რიგებში საუკეთესო ეფექტურობის კოეფიციენტი (27) აღმოაჩნდა, მის გარდა კი სტუმართა მხრიდან სენეგალელი პაპე სოუ (23 ქულა) და ირანელები – ხაბაჰრამი (18) და ყამრანი (17) გამოირჩნენ. ლიბანურ კლუბს ამერიკელმა ლეგიონერმა დევარიკ სპენსერმა ულიდერა, რომელმაც 38 წუთში 39 ქულა ჩააგდო.
აზიური თასის ფინალური სერიის მე-2 მატჩს ხვალ, ისევ ბეირუთი უმასპინძლებს, მომდევნო სამივე შეხვედრა კი, თუ ამის საჭიროება შეიქნა, ირანში ჩატარდება.
