ევროპის 2017 წლის ჩემპიონატის მასპინძლის ვინაობა მიმდინარე წლის დეკემბერში გაირკვევა, მანამდე კი პირველი განაცხადი უკვე გაკეთებულია – უკრაინამ მომავალი ევრობასკეტის თანამასპინძლობაზე განაცხადი გააკეთა.
უკრაინას ისედაც უნდა ემასპინძლა რამდენიმე დღის წინ დასრულებული ევროპის ჩემპიონატისთვის, თუმცა მათ ქვეყანაში მიმდინარე არეულობამ ფიბა-ევროპა აიძულა, კონტინენტის პირველობა სხვა ქვეყანაში გადაეტანა. მოხდა ისე, რომ პირველად, ისტორიაში, ევრობასკეტს რამდენიმე ქვეყანამ ერთდროულად უმასპინძლა. მოგეხსენებათ, ტურნირი 4 ქვეყანაში ჩატარდა და ამ სისტემამ, როგორც იტყვიან, გაამართლა.
შესაბამისად, ფიბა-ევროპამ განაცხადების მიღება როგორც ევრობასკეტის ერთპიროვნულ, ისე ჯგუფურ მასპინძლობაზეც გამოაცხადა. ამავდროულად, ისიც ცნობილია, რომ ფიბა-ევროპა უკრაინელებს დაჰპირდა, თუკი მათ ქვეყანაში მშვიდობა ჩამოვარდებოდა, მომავალ – 2017 წლის ევრობასკეტის მასპინძლობის უფლებას მათ დაუბრუნებდა. უკრაინაში ომი დღემდე მძვინვარებს, თუმცა ეს არ ეხება ქვეყნის უმეტეს ნაწილს, სადაც ადამიანები ჩვეულ რიტმში ცხოვრობენ და მშვიდობიან ტერიტორიებზე შეუზღუდავად ტარდება ნებისმიერი სახის ღონისძიება.
ასე და ამგვარად, უკრაინელებმა ჭკუა იხმარეს და ფიბა-ევროპას ევროპის ჩემპიონატის თანამასპინძლობას სთხოვენ. განაცხადი უკვე გაკეთებულია, ევროკალათბურთის მამები კი გადაწყვეტილებას დეკემბერში გამოიტანენ. თუკი ევრობასკეტი კვლკავ იგივე სისტემით ჩატარდა, როგორც წლეულს, უკრაინა დიდი ალბათობით რომელიმე ჯგუფის თამაშებს უმასპინძლებს.
