ბითაძის 13 ქულა იუტასთან

ნაციონალური საკალათბურთო ასოციაციის მორიგი ტური გოგა ბითაძის „ინდიანა პეისერსის“ მატჩით გაიხსნა, რომელიც კონფერენციის ლიდერს „იუტა ჯაზს“ ესტუმრა და 111:119 დამარცხდა.

ბითაძემ NBA-ის საუკეთესო დაცვით გუნდთან ნამდვილად გამორჩეული შეხვედრა ჩაატარა. მან 12 წუთი და 25 წამი ითამაშა და ამ დროში 13 ქულა, 4 მოხსნა (1 შეტევაში, 3 დაცვაში) და 1 ჩაჭრა დააგროვა. გოგა საკმაოდ მაღალი სიზუსტით გამოირჩეოდა, მან ორიდან ერთი ორქულიანი ჩააგდო და პერიმეტრიდან ოთხიდან სამი სამქულიანი გამოიყენა. ახალგაზრდა ცენტრმა ბურთი ორჯერ დაკარგა და მეტოქის წინააღმდეგ სამჯერ დაჯარიმდა. მისი პარკეტზე ყოფნის პერიოდში „ინდიანამ“ საერთო ჯამში 5-ქულიანი უპირატესობა მოიპოვა.

რაც შეეხება შეხვედრას, „ინდიანამ“ მატჩი ძალიან კარგად დაიწყო და პირველ ტაიმში, როგორც შეტევაში, ისე დაცვაში, მეტოქეზე ბევრად უკეთ გამოიყურებოდა. საწყის პერიოდში ნეიტ ბიორკგრენის გუნდი „იუტას“ 8 ქულით გაექცა, მეორე მეოთხედში კი ეს უპირატესობა 13 ქულამდე გაზარდა. მეორე ტაიმის დასაწყისში სამწუხარო ფაქტი დაფიქსირდა –  „ჯაზის“ ლიდერმა და სუპერვარსვლავმა, დონოვან მიტჩელმა ბურთისთვის ბრძოლის დროს მძიმე დაზიანება მიიღო, მან კოჭი დაიზიანა და სტადიონის ნაადრევად დატოვება მოუწია. მთავარი ლიდერის გარეშე დარჩენილი გუნდის წინააღმდეგ „პეისერსს“ თითქოს უფრო დიდი უპირატესობა უნდა მოეპოვებინა, მაგრამ ქვინ სნაიდერმა და მისმა გუნდმა ძალები მოიკრიბა და ანგარიში გაათანაბრა. საბოლოო ჯამში ყველაფერი ბოლო მეოთხედში გადაწყდა – იუტელებმა მოპოვებული უპირატესობა შეინარჩუნეს და რეგულარულ სეზონში მორიგი გამარჯვება გაიფორმეს.