დღეს, სპორტისა და ახალგაზრდობის საქმეთა სამინისტროს სააქტო დარბაზში კალათბურთის ფედერაციის საანგარიშო ყრილობა გაიმართა, რომელსაც გამგეობის წევრები და ყრილობის 34 დელეგატიდან 31 დაესწრო.
ყრილობა კალათბურთის ფედერაციის პრეზიდენტმა ბესიკ ლიპარტელიანმა გახსნა. დღის წესრიგის მიხედვით საანგარიშო პერიოდში გაწეულ სამუშაოზე ისაუბრა ფედერაციის გენერალურმა მდივანმა მერაბ რატიშვილმა. ყრილობის დელეგატებმა კალათბურთის ფედერაციის მიერ გაწეული საქმიანობა დადებითად შეაფასეს, რის შემდეგაც ფედერაციის ახალ გამგეობას უყარეს კენჭი.
ყრილობამ კალათბურთის ფედერაციის გამგეობის ახალი შემადგენლობა ერთსულოვნად დაამტკიცა. გამგეობაში შემდეგი 9 ადამიანი შევიდა: ბესიკ ლიპარტელიანი, დავით გიორგობიანი, გიორგი ქართველიშვილი, ნიკოლოზ დერიუგინი, პაატა გურასპაული, ნოდარ ქორქია, გივი ბიჭიაშვილი, მერაბ რატიშვილი და ვალერი ლომაძე.
