ვიქტორ სანიკიძემ იტალიის ჩემპიონატი გამარჯვებით გახსნა. მისმა გუნდმა „სიენამ“ „ბრინდისის“ უმასპინძლა და იოლი გამარჯვება მიითვალა – 92:65.
სიენელებს მეტოქე პირველ ტაიმში გაუძალიანდა. დიდი შესვენებისთვის სანიკიძის გუნდი მხოლოდ 1 ქულას იგებდა, თუმცა მეორე ტაიმში სრულ უპირატესობას დაეუფლა და მეტოქე დიდი სხვაობით დაამარცხა.
გამარჯვებაში თავისი წვლილი სანიკიძემაც დაიდო. ქართელი ფორვარდი სასტარტო ხუთეულში იყო და მოედანზე 23 წუთი გაატარა (27 წუთზე მეტი სიენელთაგან არავის უთამაშია). სანიკიძემ საბოლოოდ სიენელებს 9 ქულა, 3 მოხსნა, 2 პასი, 1 ჩაჭრა და 1 დაფარება შესძინა. ვიქტორმა 3-ვე ორქულიანი და 6-დან 3 საჯარიმო გამოიყენა, ბურთი ერთხელ დაკარგა, ერთხელვე დაჯარიმდა, მის წინააღმდეგ კი თამაშის წესები 5-ჯერ დაირღვა. სარგებლიანობის კოეფიციენტის (16) მიხედვით, ქართველი კალათბურთელი “მონტეპასკიში” მე-3 გახლდათ და მხოლოდ ბენჯამინ ეზეს (12 ქულა, 11 მოხსნა) და დევიდ მოსს (15 ქულა, 4 პასი, 3 ჩაჭრა, 3 მოხსნა) ჩამორჩა. გამოსარჩევია ბობი ბრაუნის ასპარეზობაც (18 ქულა).
სერია A-ში მომდევნო მატჩს „სიენა“ 30 სექტემბერს, სტუმრად, „რეჯიო ემილიას“ წინააღმდეგ გამართავს.
